虹口菜场

虹口菜场（英语：HongKew Market），因为伊个地理位置貤叫三角地菜场，是上海市最早个菜市场，来勒虹口区三角地一带，也就是塘沽路、汉阳路、峨嵋路三条马路围起来个面积约10亩个三角形地块。

历史

前身

19世纪末期，上海公共租界工部局来勒苏州河以北个虹口地区开辟多道马路。當中，文监师路（乃朝塘沽路）逐渐由东向西延伸，吴淞路搭密勒路（乃朝峨嵋路）由南向北延伸，汉璧礼路（乃朝汉口路）由西向东延伸，箇四条马路来勒箇埭交汇，形成一块约10亩个三角形地块，大家叫伊“三角地”。一开始呢，英国人来勒箇埭开辟游艺场；必过常常出事体伤人，畀工部局勒令停业。後些来，箇块空置个土地演变成露天菜场。

室内菜场个建立

虹口菜场

租界当局受到露天菜场个启发，1890年（光绪二十六年）来勒“三角地”搭了隻砖木结构个室内菜场，是上海头一隻菜市场——虹口菜场，俗称“三角地小菜场”。菜场来勒文监师路（乃朝塘沽路）对开方向造仔座小亭子，中部还有天棚，方便采光通风。菜场里向划出一格一格个空间，出租畀卖菜个人摆摊头。租客除开交摊位费，还要纳税、缴管理费。

重新改造

1915年，因为生意忒好了，工部局拿伊改造成钢筋混凝土结构个三层建筑，是上海顶大个菜市场，双层楼梯上下——底层主要是蔬菜市场；二层卖鱼肉类副食品、罐头食品搭仔农副产品；三层是各种小吃点心店。卖菜个人国籍则包括中国、日本、俄国咾啥个。相当长个一段辰光里向，三角地菜场一直是上海面积最大，经营品种最全，服务设施到位个室内菜市场，“三角地”成为上海著名地名搭小菜场个代名词。

三角地菜场个经营品种口号是：“蔬菜品种齐，糟、醉、腌、腊、风，青、草、花、白、鲤样样有。”亦有文人来勒《沪江商业市景词》里向箇能描述三角地菜场：“造成西式大楼房，聚作洋场作卖场。蔬果荤腥分位置，双梯上下万人忙。”

战争期间

淞沪战争以後，日本势力来勒虹口坐大，来勒三角地小菜场周围一圈，形成了“日本化”街区，人称“小东京”。

太平洋战争爆发以後，日军占领公共租界，菜场畀强行改名为“麦盖岛”（Market个日文译音）。抗战胜利以後恢復叫“三角地菜场”。

中華人民共和國时期

上海戰役以後，伊依然是上海顶大个室内菜场，上海四大菜场第一，一天卖个蔬菜副食品总量好超过40吨。

政府拿小摊贩按行业合併成小组；二楼个花木、竹器等业务划畀有关行业经营，各类荤素副食品摊位搬到底楼去。两楼部分变成办公、生活用房，部分划畀一家玩具厂。三楼改成招待所、学堂搭仔宿舍。

改革開放後

三角地菜场来勒1979年、1983年受到中华人民共和国国务院搭中國商務部个表扬，1986年畀评为上海市文明单位，1987年捞着国家五一劳动奖状，1992年畀评为全国先进企业，1993年内贸部认证是“中华老字号”企业。20世纪九十年代后期，三角地菜场畀拆脱，现在箇埭有座40层楼高个宝钢旗下个宝矿国际大厦，底楼还是三角地菜场。

现在有2010年5月11号成立个上海三角地菜市场经营管理有限公司，负责虹口区个小菜场。2023年11月份，商务部等5部门公布“中华老字号”复核结果，上海三角地菜场通过复核。