上海耀雪冰雪世界

上海耀雪冰雪世界貤叫交通银行耀雪冰雪世界、耀雪冰雪世界，是来勒中華人民共和國上海市自贸区临港新片区滴水湖边个冰雪旅游景点，总建筑面积约莫35万平方米，由上海陆家嘴（集团）有限公司搭上海港城开发（集团）有限公司一道开发个，上海建工承包造个，2024年9月6号正式运营。上海耀雪冰雪世界个设计主题是阿尔卑斯山。

景点

上海耀雪冰雪世界里向有隻耀雪雪世界。耀雪雪世界里向有室内真雪滑雪场、冰场搭其他近廿项个娱雪项目，超9万平方米。滑雪场个温度控制勒-5℃，有4条雪道，垂直落差约莫60米。耀雪雪世界里向还有室内小火车雪国列车。

上海耀雪冰雪世界里向还有隻耀雪水世界，有近廿项嬉水项目，面积约2万平方米。

上海耀雪冰雪世界还配套3座星级酒店。當中一家个屋顶丄有屋顶缆车，好拿游客送去耀雪雪世界；另外一家酒店有17间套房是好室内滑进滑出个，住客好从阳台丄直接进雪道滑雪。

上海耀雪冰雪世界还设有多功能会展中心搭仔冰雪主题商业小镇。

历史

2024年7月26号，上海耀雪冰雪世界头一趟开放部分内景。8月8号开始正式卖门票哉。9月6号正式营业。

相关问题

耀雪冰雪世界来勒2024年8月份非正式营业个辰光就已经发生多桩因新手操作弗当导致个伤人事故，畀嘲“怪弗得开勒六院门口，是有原因个啊”。场馆方面表示，场馆个雪道主要面向专业滑雪者设计，呒没滑雪经验个新手直接上场弗适合个，後续会得畀新人开辟练习区域，生怕伊拉再拿人弄伤脱。