二万户工人住宅

二万户工人住宅，一般性叫伊两万户，是1950年代上海造个工人房子，由国家投资，拢总用脱5821万元人民币，造仔1052幢，建筑面积552671平方米，每户平均27.675平方米，分布拉沪东、沪西、沪南工业区附近个9只基地里向，造出凤城、鞍山、日晖、玉田、志丹等9個工人新村，10万户职工家庭搬进新房子。

历史

背景

中华人民共和国刚刚建国个辰光，上海工人个居住条件邪气推板，弗少住拉棚户区里向，产业工人住房困难。故咾1952年4月11号，上海市人民政府市长办公会议决定当年造“二万户”工人住宅，按照苏联集体农庄个理念进行设计。8月15号，上海市人民政府、华东军政委员会建筑工业部搭仔市总工会召开二万户工人住宅建筑工程开工庆祝大会，伊個辰光个上海市副市长方毅等市领导同上海各界5000多名代表出席大会。

建造情况

1953年，勒拉沪西、沪东、沪南个工厂区附近造起一批工人新村，夯吧啷当2000個单元，每只单元好住10户人家，一共二万套住房，解决10万工人个居住困难问题。两万户个建设也开启上海建设工人新村个时代，箇种叫“老公房”个小区影响两三代上海人。

房屋分配

“两万户”新村首先分配畀工业企业，再来勒企业里向分配畀具体职工。两万户大部分侪分配畀中央国企哉，挺下来个多数分畀地方国企。具体到個人，主要是劳动模范同工人领导拿到新房子，而且总数一句两万户还是弗够多，一般工人房子分唻少。

房子现状

经过几十年个发展，二万户住宅已经破透破透，十户人家公用厕所间搭仔灶披间个集体式居住环境也弗再适合现代城市居民个居住需求。1979年，上海市房地产管理局开始勒拉二万户本生个二层楼浪加造三层楼，分层设置厕所间搭仔灶披间，扩大居住面积。1985年代开始，政府对超过30年历史个二万户住宅进行煤卫独用改造搭仔动迁拆除工程，到21世纪初，杨浦区大部分二万户住宅侪畀拆脱。2016年，上海阿末一片两万户小区-杨浦区长白街道228街坊200多户居民动迁，拿箇12幢两万户房子保留下来，做城市更新试点项目。