冯国璋

冯国璋（1859年1月7号－1919年12月28号），字华甫，晚清搭北洋时代个有名人物，北洋军阀集团个代表之一，直系军阀个首领，谐星冯巩个祖宗。

冯国璋

生平

出生直隶省河间府河间县（今河北省河间市），1890年来拉天津武备学堂毕业，之后替袁世凯做事体。1901年，担任袁世凯设立个保定军政司个教务处总办；之后，又在拉顺天府担任军事教官。1907年，任军谘使。

1911年武昌起义之后，冯国璋担任第一军总督，趁火车到仔汉口郊外，武力镇压革命；当年十一月廿七号，冯国璋个北方人军队占领仔汉阳县城，乃么革命军个总司令黄兴只好退回到武昌府防守。伊也因为迭个功劳，畀清帝国封作仔男爵。

之后，袁世凯接受仔孙中山个条件，预谋退溥仪位，冯国璋作为袁世凯个心腹，弗再进行军事行动。1912年2月，清帝国完结，袁世凯任中华民国大总统，冯国璋任总统府军事处处长。9月，伊改任直隶都督兼民政长。

1913年，南方革命党控制个省份，因为弗满意袁世凯搭仔伊个北洋军阀系统控制中华民国，在得着仔孙文支持之后，开始发动“二次革命”。冯国璋畀袁世凯任命为镇压南方人个头目，第二趟南下，弗多几许日脚，南京也攻落来哉。同年12月，出任江苏都督；1914年6月，畀袁世凯封作仔将军府宣武上将军。

在拉迭个阶段，冯国璋慢慢搭张勋之类复辟、宗社党走进，乃么袁世凯开始有心事哉。也因为迭个原因，在拉1915年袁世凯称帝辰光，冯国璋表示反对。迭个里向个原因弗在于因为伊支持共和，实际上是因为称帝个是袁世凯，而弗是复溥仪位。

1916年6月6日袁世凯故脱之后，黎元洪继任大总统，10月30号，经国会补选，冯国璋担任副总统，在拉南京办公。

此后，北洋集团逐眼分裂成功皖系搭直系，冯国璋也成为仔直系首领。1917年7月，大总统黎元洪搭国务总理段祺瑞个府院之争。张勋趁机复辟，失败脱之后，冯国璋在拉7月到北京，担任代理大总统到1918年10月，在拉迭个阶段，伊搭段祺瑞个关系也慢慢能开始搭僵起来，到末脚两个人一淘落野。

落野仔以后，冯国璋在拉1919年年初，回转老家河间县开始经营屋里向个事体，包括投资开滦煤矿、中华汇业银行咾啥。之后，又重新回到仔北京；1919年年底故脱，北洋当局替伊举办仔国葬。