刘濞
刘濞（前216年－前154年），沛县人，汉高祖刘邦个阿侄，刘邦个阿哥刘仲个倪子，畀刘邦封为吴王。汉景帝个辰光，发动七国之乱谋反，兵败，畀杀脱。
生平
编辑汉高祖十一年乙巳（前196年）年满廿岁个刘濞畀封为沛侯，英布造反个辰光，刘濞做之骑将，跟之刘邦打败之英布。
刘濞从军有功，汉高祖又顾及吴地民风彪悍，要选壮王来镇，汉高帝十二年丙午（前195年），刘邦怕江东人不服皇权，就封刘濞为吴王。 高祖又改当年刘贾所封个荆国为吴国，统辖东南三郡五十三城。到底汉朝个吴国定都勒哪搭，史料侪呣没畀出确切个讲法，现在已经弗大可能查清哉。
汉文帝个辰光，刘濞个倪子吴国世子刘贤，勒京城长安搭皇太子刘启着棋个辰光发生之争执，后来吴世子对太子弗敬，刘启就发火哉，俚拿棋盘敲刘贤个头，刘贤就畀俚抲杀脱哉。汉文帝敕命拿吴世子个遗体送回吴国安葬，到之吴国，吴王刘濞大怒，说道：“天下侪是刘家个，死勒长安就埋勒长安，啥体送回吴国埋葬！”就又拿遗体送回长安埋葬，以示对朝廷个弗满。 汉景帝登基，采纳御史大夫晁错个建议，削夺王国封地，刘濞谋划之“清君侧”个策略，以诛晁错为名，联合楚国、赵国几个国家一淘叛乱。勒景帝前元三年丁亥（前154年），带领七个诸侯国个军队公开叛乱，史称七国之乱。后来汉景帝只好拿晁错杀脱，但不过还是弗能平息七国之乱。最后汉朝派周勃个倪子周亚夫为帅，拿七国个军队击败，刘濞兵败投奔东瓯国，后来东瓯王弟“夷鸟将军”拿刘濞杀脱哉。
七国之乱平息后，朝廷保留之楚国，但弗许德侯继承高祖兄弟刘仲个祀，封国吴国就畀废除脱哉，吴国从此灭亡。