叶澄衷

叶澄衷（1840年－1899年），吴越人，出生浙江镇海。是19世纪后半段上海有名个商人、第一批海上闻人之一。伊在拉五金迭个行当中得着邪气高个地位、做着邪气高个市场占有率，是上海搭仔吴越地区近代五金行业个先驱。此外，伊也乐于搞慈善、办教育——澄衷中学便是伊捐钞票创办个。

生平

贫苦少年

1839年 ，叶澄衷出生于宁波府镇海县庄市个一户贫民家庭中，父亲叶志禹是个出海打鱼个渔夫，母亲是家庭主妇。

迭个辰光个宁波，虽然已经有蛮发达个出海传统，但人多地少个问题，仍旧是交关严重。叶家在当地只不过是普通农民。叶澄衷出生以后伊玱里，也弗曾过上过仔啥好个日脚。弗过作为”浙东邹鲁“，此地对老百姓个文化教育一直相当看重，虽则屋里贫困，还是在拉叶澄衷5岁个辰光，送伊到私塾当中读书识字；假使无啥事体，就搭父亲下地种田，或者在拉渔汛期同阿爸出海打鱼。

天有弗测风云。在拉伊10岁左右个辰光，叶志禹出海遭遇风浪，葬身鱼腹。乃么叶家主要个劳动力丧失脱，尽管伊拉娘省吃俭用，做足人家，也无办法继续支撑叶澄衷读书个费用。叶澄衷无么办法，只好退学，到当地一爿油作坊做学徒。之后两年里，伊就在拉各种杂货店做学徒；空落来仔还要相帮老板做做家生事体。小辰光个苦，一方面让伊充分了解着日脚难过，另外一方面也让伊接触着生意场上向个各色场景，头脑培养来蛮敏锐；而读私塾个经历也弗曾因为退学咾淡化，反倒替伊后手来重视教育个思想埋落伏笔。

从私塾先生搭从外地打工转来个同乡许头，叶澄衷开始解着距离宁波弗远个上海有得几许繁荣。伊歇上海刚刚开埠，还远远弗及后世个能繁华；但从18世纪开始，就有得蛮多全国各地、尤其是宁波商帮个势力集聚在拉；个咾对于人多地少个宁波本土来讲，此地是一块充满机遇，又在拉风俗民情上向好搭自家通融个场许。1853年，14岁个叶澄衷终于决定离开故乡，搭一名同乡来到上海，寻求自家发展个机遇。

黄浦江上卖杂货

叶澄衷来到上海之后，同个辰光交关来到上海个外地人一样，迅速寻着自家所在个宁波会馆，并通过散布在拉上海个宁波同乡关系网，畀介绍到外滩洋泾浜三茅阁桥（个辰光属于法租界）个一家杂货铺做学徒。个辰光个租界商业还弗算繁荣，同董家渡等地相比还是比较荒凉，但黄浦江当中个外国船舶，则早已经络绎不绝。善于观察个叶澄衷，老快发现个当中个商机，加上伊自家会游泳，擅长驾船，就自告奋勇，拿店铺进货个小舢板装满零售货品，在拉黄浦江中摆渡，向外国船舶个乘客兜售舢板船里装载的杂货，此种做法，在拉二十世纪中叶个亚非拉殖民地国家，还是相当常见，在拉当时，就更普遍哉。

同洋人打交道，自然要学习外文。叶澄衷作为一个农家子弟，自然是无任何英文基础个。为仔克服语言障碍，伊拿赚得来个钞票交畀拉一位会得讲英文个商人，请求商人教伊两句日常用语，还买仔一本用宁波方言注音个《英语话注解》自学。迭能逐眼锻炼下来，叶澄衷开始有能力搭外国商船乃至兵船上向个人做生意。在拉迭个过程当中，伊既获得着利润，英文水平也逐步提高，个咾在拉船上个生意越做越顺，弗多几时便用自家个积蓄买仔一条船，自立门户。

弗过，此种生意虽则利润蛮大，但风险也如影随形。一个秋天个早浪向，伊搭平素一色能进货，摇船摇到大船旁边去卖，弗曾想，大船突然起锚，叶澄衷反应弗及，浪头一起来舢板也掀翻脱，亏得伊水性好，否则性命也无么哉。迭个一年伊大概只有16岁。

碰着贵人

之后，一桩传奇个事体改变仔叶澄衷个人生。

1859年夏，叶澄衷卖好货品仔以后，小舢板在拉洋泾浜（乃朝延安东路）同黄浦江个汇合口停好仔么自家开始吃中饭。着末生，有一个英国人拎仔一只大包，要求趁坐伊个只小舢板，到浦东杨家渡，叶澄衷看伊面色焦急，就立时答应，摇船直奔浦东。

恰恰到仔浦东靠岸，洋人就急吼吼跳落来，消失在拉人群当中。叶澄衷低头一看，发现伊只公文包落在船上向忘记脱拿哉。打开来一看，发现里向有海会个钞票、支票等贵重物品。倘使调成功别人，作兴老早自家袋袋里囥进。但是叶澄衷决定生意先摆一摆，等迭个商人回转来。

个歇也弗巧，天开始落雨哉。叶澄衷弗关，还在拉码头等，浑身统统湿脱。过仔一个钟头弗到，失主匆匆出现，看见叶澄衷拿公文包还畀自家，激动来一天世界，在拉转去个路上就邀请叶澄衷来参与自家个买卖；晓得叶还懂点基本个英文之后，伊越加感兴趣起来。末脚，英领事馆允许叶澄衷登上外国轮船做生意，乃么叶澄衷个生意范围大大扩展哉。

成为五金大王

此后，叶澄衷个人生也因为洋人运道一直蛮旺——洋人开始带伊做五金生意。因为聪明好学来事，叶澄衷学起来邪气快，一歇歇工夫便建立起自家个人脉搭仔进出货渠道哉，外加开始接触各种同船舶相关个五金大小生意。

经过几年个发展，同时加上仔太平天国战乱带得来个江浙大量华人难民涌入搭仔租界经济繁荣，叶澄衷迅速积累起自己个财富，乃么伊开始真正规划自家个事业起来哉。1862年，23岁个叶澄衷选定上海虹口没租界靠近外滩个百老汇路（大名路）开设一家五金店，名曰顺记五金洋货号，个也是上海开埠后由华人开设个第一家五金店。

叶澄衷拿五金店拣在拉虹口开设，迭个也是有得考究个。虹口个歇实际上向已经逐渐开始取代董家渡，成为仔外国商船上货卸货个重要码头。现在个北外滩，从1860年代开始个一个多世纪当中，始终保持上海重要个码头地位。叶澄衷在拉迭个时代之处就设立仔五金店，个么迭个里向个出息自然邪气丰厚，市场竞争力也越来越大，生意蒸蒸日上。“顺记五金”个经营范围逐渐遍布长江中下游各个商埠^bu3。

到1890年代，顺记在全国已经居^{ke1音近该，拥有}仔靠40爿分号、200多爿联号。1890年，“顺记”改名为“老顺记”，叶澄衷成为仔名副其实个“五金大王”。

叶澄衷还将贸易范围扩展到火油、钢铁、煤炭、航运、缫丝等行业，并通过生产军需用品逐渐建立起搭官方个联系。随着生意范围越来越大，需要资金流转，乃么叶澄衷开始进军金融业。当时国内金融机构主要有得票号、钱庄、银号、银行迭个几种。叶澄衷首先在拉上海创办“大庆元”、“升大”、“衍庆”、“大庆”、“怡庆”几爿票号，后手拿票号扩展至杭州、汉口、天津、镇海、芜湖、湖州、温州、宁波、烟台等城市，共建立钱庄、票号一百爿弗罢。至90年代，叶澄衷已经有得800万两资本。

在拉银行资本扩张之后，伊开始涉足房地产事业，在拉虹口地区（现在虹口区个南面地段）大肆扩张自家个土地所有权，海宁路、塘沽路、唐山路等地，一条街上向有得一大半个地皮是伊个，广阔个地产为叶澄衷个财富提供巨大兜底，更让伊同后来拥有南京路个哈同一样，跻身沪上名流之列。

凭借雄厚的资本及与官方的联系，叶澄衷参与了中国人自办第一家近代银行的创办。1897年，叶澄衷与同乡严信厚、朱葆三等合作，创办中国通商银行，并成为首届董事之一。

泽被广阔成名绅

在拉商业上向获得仔极大个成功之后，叶澄衷个社会地位也逐眼提高。身为上海滩华人巨富，浸润在维多利亚时代搭仔传统儒家世界观当中个宁波富翁，自然会把自家个经历从单纯个商业拓展到对慈善、教育个贡献浪。

在拉市政工程方面，顶有名个事体是捐资修造老白渡桥。苏州河上有十余座桥梁，其中外白渡桥是顶具有代表性个地标。弗过，老早迭个位置上有一座木桥叫威尔斯桥，经弗起风吹雨打，烂脱仔要重建，但工部局铜钿出弗出。叶澄衷主动捐献2000两银，占仔投资个1/3。新桥建成功仔以后，华人过桥也弗需要再付钞票，个咾就得着“白渡桥”迭能一个美名。

叶澄衷对教育个资助相当早，在拉1871年，伊就提出要“兴天下之利，莫大于兴学”个主张，开始通过自家个资本，大力发展教育。

1875年，叶在上海虹口创办“叶记商务学堂”。

1898年年初一日，叶澄衷随搭老友到上海虹口张家浜考察厂址，看见一群小囡聚在拉河滩横边白相。眼见水势变大，乃么伊喊：“当心！危险否、豪燥转去！”，但两个小囡弗听劝，还骂伊山门。尽管个能，叶澄衷还是豪燥喊人硬劲拿伊拉拖转来岸上向。

联想着大厦将倾岌岌可危之势，叶澄衷感叹：“中国之积弱，由于积贫，积贫由于无知，无知由于不学，兴天下之利莫大于兴学。”

弗多几时，闻名后世个澄衷蒙学堂（今澄衷中学前身）搭仔叶氏义塾（今中兴中学前身）就在拉上海、宁波两地拔地而起。叶澄衷还委托刘树屏编撰晚清第一部现代教科书《澄衷蒙学堂字课图说》，迭个近代中国国语教育产生仔重要影响。

叶澄衷尽管腰缠万贯，还是始终保持着生活俭朴、为人忠厚、关怀社会个品质。早年经历让伊深刻体会着下层民众生活艰难以及教育个重要性。叶澄衷拿出2万两白银建成怀德堂，接济穷苦员工家庭；又像传统绅士介能，在故乡建立仔义庄，替乡民提供保护——迭个反映出伊传统士绅个一面，也是对儒家文化比较正面个凝结核作用个传承。

故脱搭纪念

1899年，叶澄衷病重去世，归葬宁波镇海叶氏义庄附近。伊庞大个产业，则畀七个子女分脱。几个小囝里向儿子叶子衡顶出名，后手在拉江湾修跑马场，搭仔洋人个跑马产业竞争，红极一时；另外还修仔澄衷疗养院，畀拉观看跑马者休憩。

1921年，叶澄衷塑像在拉澄衷中学落成，造像庄重，身着长衫。但是迭个衣裳叶澄衷一世人里也弗曾着过：尽管富甲上海，但伊一径以朴素个形象示人，从来弗曾着过啥丝绸个衣裳。