司马懿(179年-251年9月7号),字仲达,河内郡温县(今河南省焦作市温县)人,三国辰光魏国个权臣、官僚、阴谋家。伊出身士族,年轻辰光是投靠在拉曹操阵营。开初曹操弗重用伊,但后手来伊慢慢能依靠自家个手段,开始进入曹魏个核心人淘里向。到曹操故脱、魏帝国建立之后,伊成为仔一个重要个权臣,常常替曹魏帝国领兵相打。个当中,伊挫败季汉北伐个事体,后手来因为《三国演义》行起来,大部分人侪蛮熟悉;伊搭诸葛亮个故事,也成为仔经典。

到魏明帝曹叡统治阶段,司马懿已经成为仔除脱曹魏皇族之外地位顶高个大臣,也引起曹魏王室疑心。到曹芳登基仔之后,曹爽一度排斥伊,让伊只好装痴装戇;弗过么也是因此,曹爽放松脱仔警惕——迭能一来伊邪气得势,在拉晚年发动高平陵之变,彻底控制牢曹魏个政权。伊之后,儿子司马师司马昭接班;到仔孙子司马炎手里向,彻底吞脱曹魏帝国,建立仔晋帝国