吴歌
吴歌，是文学史浪对吴地民歌民谣个总称，也吴文化个重要组成部分， 吴歌是吴语方言地区广大民众个口头文学创作，发源于苏锡常地区，苏州地区是吴歌产生发展个中心地区。吴歌口口相传，代代相袭，有交关浓厚个地方特色，以表现男女爱情为主。 因为历史浪历代区域划分弗同，早期"吴"是吴国领域个概念，甚至包括现在个南京搭扬州等地。现在所讲个"吴"，是指吴语区，包括江苏南部，浙江北部和上海市，也就是江浙沪等地个同一个吴语区语言文化圈，同属传统吴文化范畴。吴歌也就勒上头讲个搿点地方流传。吴歌跟历代文人编著个诗、词、歌、赋弗同，俚是下层人民创造个俗文化，是民间个口头文学创作。
历史
编辑吴歌起源非常早，顾颉刚《吴歌小史》认为不会晏于《诗经》。《诗经》里向虽然呣没吴歌，但不过有人认为吴歌“实可与诗三百并驾齐驱”。 明人王世贞说：“虽俚字乡语，不能离俗，而得古风人遗意；其辞亦有可采者。如‘月子弯弯照九州，几家欢乐几家愁?几人夫妇同罗帐？几人飘流在他州?’又‘约郎约到月上时，只见月上东方不见渠。不知奴处山低月上早?又不知郎处山高月上迟?’即使子建太白降为俚谈，恐亦不能过也。” 吴地文化从考古发现来看，已经有上万年个历史哉。吴歌作为一种文化现象，必然是随之当地初民个生产劳动，祭祀习俗，搭生活娱乐活动而发生发展个。作为一种口头文学，勒呣没文字之前，蛮难寻着俚个遗迹。今朝要想寻着古代吴歌个真貌，已经是一件交关困难跟复杂个事体哉。
音律
编辑吴歌里向又有“命啸”，“吴声”，“游曲”，“半折”，“六变”，“八解”六类音乐，其中后三类是汉代以来才有个。此外还有“神弦曲”，搿是当地个民间祭祀乐歌。“吴声”当中有一种根据旧曲而创新个编曲手法，称之为“变”。
分类
编辑吴歌，包括"歌"搭"谣"两部分。"歌"一般来讲就是"唱山歌"，也包括有种俗曲之类；"谣"就是通常讲个"顺口溜"。吴歌搭历代文人编著个诗、词、歌、赋弗同，是下层人民创造个口头文学。吴歌生动个记录之江南农民搭下层人民个生活史，从内容浪来看，吴歌既包括情歌，也包括劳动歌、时政歌、仪式歌、儿歌等。 吴歌以民间口头演唱方式表演，口语化个演唱是俚个艺术表现个基本方式。吴歌是徒歌，勒呣没任何乐器伴奏个情况下头来唱。俚个类型大致有引歌（俗称"歌头"，长篇叙事歌称"闹头"）、劳动歌、情歌、生活风俗仪式歌、儿歌和长篇叙事歌等几种。
四大嫡系
编辑虽然吴歌勒现实生活当中，离平常百姓个生活越来越远哉，但不过相城阳澄渔歌搭常熟白茆山歌、吴江芦墟山歌、张家港河阳山歌一淘畀称为吴歌“四大嫡系”，搿两年来开始活跃到之群众个视野当中哉。
参考文献
编辑- 张正田，〈南朝吴方言与台湾苗栗客语关系——以吴歌的阳、入声韵为中心〉，“苗栗学‘地域、族群与文化’学术研讨会”(苗栗)，国立联合大学，2007.06.01
- 《苗栗学“地域、族群与文化”学术研讨会论文集》，2007.11，页65-78。