年糕

年糕，东亚个一种传统美食搭仔过年吃个物事。年糕同“年高”谐音，有年年高升个意思。年糕早期是来勒年夜里祭祀神灵、供奉祖先用个，後些来慢慢交转变成一种新春食品。

荠菜炒年糕

传说

江南一带流传一则同年糕有关个传说。春秋时代，吴国大夫伍子胥畀吴王夫差赐剑自刎而死。传说伍子胥死前嘱咐亲信讲民众来勒国家有难貤呒没喫个个辰光，到象门城墙掘地三尺，就可以得到食粮。越王勾践听到伍子胥畀吴王夫差赐死个消息，连忙跑来攻打吴国，节节胜利。吴国个都城畀越兵围牢，城里向弹尽粮绝，军民纷纷饿死。伍子胥个亲信按照伊生前个讲法，来勒象门掘地三尺，挖到伍子胥用江米粉蒸制以後压制成个“城砖”。从此以後，每年过年，当地家家户户侪要蒸赛过城砖个江米年糕来奉祀伍子胥。因为是过年辰光做个，箇末叫伊年糕。

种类

年糕通常性是用糯米磨成粉做个。

中国年糕

北方

中国北方个年糕好蒸好炸，主要是甜个。北京年糕有江米或黄米做个红枣年糕、百果年糕、白年糕；山西习惯用黄米粉（晋语叫伊糕面）做年糕，摆勒油里向炸，馅头好用豆沙或者枣泥；河北习惯往年糕里向摆小枣、小红豆、绿豆咾啥个；山东年糕用红枣搭仔黄米蒸；东北年糕主要用粘高粱米加上豆类蒸制而成。

江南

江南个年糕白颜色各，呒啥味道个，是粳米同糯米混合出来个，粳米摆唻多一点么就软一点，糯米多一点么就硬一点，好蒸、炸、切片炒或者燉汤喫。江南部份農村用脚踏个方法做年糕，叫“脚踏糕”。