徐翔(1977年2月),又叫徐强浙江宁波人,是中国名气乓乓响个私募投资人物,现在是上海泽熙投资管理有限公司总经理。渠炒股风格以“快准狠”而出名,中国股民叫渠“宁波涨停板敢死队总舵主”。勒2015年11月1号,渠因涉嫌从事内幕交易、操纵股票交易价格勒啥畀中国公安机关捉起来哉。2017年1月23号,青岛中级人民法院判渠坐5年零六个月个牢监、罚没110亿钞票[1]

生平编辑

徐翔17岁辰光拿三万块本钿进入股票市场炒股。高中毕仔业,屋里向人同意渠放弃脱高考,专门搞金融投资。乃么渠专心研究学习股票,还看国外个投资方法。老早徐翔老老荡宁波银河证券解放南路营业部(现在个光大证券解放南路营业部),搭不少游资轧道,赚了啪啪满,箇能来当地投资圈慢慢较出名,搭又一位著名游资徐海鸥一道叫“大小徐”。[2]渠19岁辰光曾畀上海黑帮逼牢仔帮渠𡍲操盘炒股。[3]

大约摸2000年之后,随着中国股市进入熊市阶段,徐翔开始琢磨短线套利技术。渠搭银河证券解放南路营业部廿多名游资,用集中资金拿股价拉到涨停板,再拉仔一两只涨停板后平仓抛脱个方式,赚仔交关钞票。渠𡍲也能够成功“追到涨停板”,往往比庄家赚了也多。2003年2月15号,《中国证券报》报道了银河证券宁波解放南路营业部箇帮游资,叫渠𡍲“宁波涨停板敢死队”,从此以后,徐翔箇只名字公众侪晓得哉。[4]

2005年,徐翔从宁波搬到上海[3],来浦东新区汤臣一品买落仔豪宅,渠勒汤臣一品对过个东亚银行大厦上班,每日来离东亚银行500米左右个上海国际金融中心吃中饭[5]。渠来2007年个牛市当中赚仔交关。2009年,渠勒上海开了办私募公司,自家当总经理[6]。因为崇拜毛泽东康熙,渠公司叫泽熙投资。必过泽熙投资个基金并不对外开放募集资金,只有少数特权阶层买得着。[7][8]

徐翔投资风格彪悍,为此中国股民叫渠“宁波涨停板敢死队总舵主”,[3][2]渠搭泽熙私募持仓或者关注个股票叫“徐翔概念股”,畀中国股民穷买八买。必过徐翔自家老不欢喜“总舵主”箇只绰号,渠自家做人低调唻,不大来公众面前扎台型,搭媒体网络穷捧渠大推大板。勒畀查之前,徐翔个岁数、籍贯侪没确认。渠不许媒体拍渠照,为此甚至连网络浪传仔老长辰光个照片侪错脱哉。[9]当过泽熙投资总经理助理个叶展讲,徐翔一门心思研究股市,呒没啥别个兴趣爱好。渠一日看盘12个钟头,是股市个“苦行僧”。[4]渠资产邪气多,2015年6月上旬,宁波经信委下头个《甬商》杂志发布“2015甬商百富榜”,徐翔以19.6亿元个身家位居该排行榜第44位。必过大家侪认为渠身价老老较还要多,[4]媒体搭网络浪传仔顶广个说法讲渠个人资产有搭40亿左右。[3][2]

2011年7月,有人传泽熙投资因违规畀查。徐翔头一趟接受证券媒体采访,否认违规操作搭畀监管部门调查个传闻。[2][10]渠勒2014年个牛市当中也赚仔交关,还来2015年6月个股灾前头逃脱哉。[11]勒股灾当中,徐翔曾就啊参与过做空接受过公安机关个调查,挨下来泽熙投资对外发布声明,否认参与股指期货交易。[12]7月,中国政府决定出资救市个辰光,曾邀请徐翔参与。必过徐翔认为参与救市难免会接触到一点关键个内幕信息,箇对私募基金管理人来讲邪气危险,为此回头脱箇只要求。[13]

据《每日经济新闻》披露,来2015年10月31号夜到,中国公安部门进驻泽熙投资上海总部办公室,拿渠封脱,拿电脑、文件等资料带了跑。[12]11月1号,一则徐翔勒宁波杭州湾跨海大桥上畀公安机关捉牢个消息来网络浪穷传。消息传出后,泽熙投资官网因为访问量忒多而打不开。箇日夜到,官方媒体发布消息,讲徐翔畀指控涉嫌非法手段获取股市内幕信息,从事内幕交易操纵股票交易价格等违法犯罪[14],已畀公安机关捉起来。[15]箇日是徐翔阿娘个百岁生日,渠被捉牢个辰光来从上海赶去宁波个路高头,隔手畀公安机关解去北京,呒不如期出现勒阿娘个寿宴浪。[16]

隔天礼拜一,A股股市碰着11月份“开门黑”[17],“徐翔概念股”个股价噼里啪啦跌下来,甚至跌停,还带动各指数下跌。箇日收盘上证指数下跌1.70%,深证成指下跌2.09%,创业板指下跌1.87%。[18]

根据搜狐财经网引述里头个人讲,徐翔管理个泽熙投资常年帮中共高层官员理财,徐翔案作兴牵出交关部级官员。[16][12]知名投资人黄生认为,徐翔畀捉之后,要来个风暴还要大。[8]

参考资料编辑

  1. . 搜狐财经. 2017-01-23. http://business.sohu.com/20170123/n479440593.shtml. 
  2. 2.0 2.1 2.2 2.3 泽熙徐翔等人被警方依法调查 涉嫌三大罪名.
  3. 3.0 3.1 3.2 3.3 凤凰财经. 泽熙徐翔:从3万炒到40亿的投资传奇.
  4. 4.0 4.1 4.2 网易新闻中心. 徐翔多面人生:神秘私募与苦行僧.
  5. 股神徐翔安家汤臣一品:操盘金种子酒成经典 (2012年7月2日).
  6. "中国资本市场历史记录:徐翔罕见的三次深度访谈". 网易财经. 2015-11-02. http://money.163.com/15/1102/12/B7DQ2LIM00254IU1.html. Retrieved 2015-11-02. 
  7. 大纪元. "圈内人揭股市被操纵黑幕 徐翔案或掀惊人大风暴". http://cn.epochtimes.com/gb/15/11/4/n4565304.htm. 
  8. 8.0 8.1 黄生. 徐翔之后,更大的风暴要来.
  9. 新浪财经. 5年8次传被查照片年龄籍贯无一确实 徐翔是有多神?.
  10. 人民网. “宁波涨停板敢死队总舵主”徐翔被抓(图).
  11. "私募“一哥”徐翔覆灭记". 网易财新. 2015-11-02. http://money.163.com/15/1102/05/B7D3PDTP00254TFQ.html. Retrieved 2015-11-02. 
  12. 12.0 12.1 12.2 大纪元. "消息人士:“私募一哥”案或波及多名部级官员". http://cn.epochtimes.com/gb/15/11/3/n4564456.htm. 
  13. 中财网. "我的老板徐翔:原泽熙投资总经理助理叶展亲述". http://www.cfi.cn/p20151103000353.html. 
  14. "律师称徐翔可能数罪并罚 投资者可提起诉讼". 网易财经. 2015-11-02. http://money.163.com/15/1102/12/B7DR0UTS00254IU1.html#p=B7DIJJPE54AE0025. Retrieved 2015-11-02. 
  15. "徐翔家族四大操作平台曝光 三季度已大幅减仓". 网易财经. 2015-11-02. http://money.163.com/15/1102/00/B7CHS3B600254TFQ.html. Retrieved 2015-11-02. 
  16. 16.0 16.1 搜狐财经. "徐翔被捕”致泽熙停止运转 背后或涉及多名部级官员". http://business.sohu.com/20151102/n424994970.shtml. 
  17. "徐翔案恐殃及泽熙产品 信托公司称暂未收到通知". 网易财经. 2015-11-02. http://money.163.com/15/1102/17/B7ECF0Q900254IU1.html. Retrieved 2015-11-02. 
  18. 新浪财经. A股11月开门黑 沪指跌1.7%徐翔概念股领跌.