攻壳机动队
《攻壳机动队》（日语：攻殻機動隊，英语：Ghost in the Shell）是由日本漫画家士郎正宗于1989年首次连载个网络破格（cyberpunk）科幻漫画，后首因为1995年Production I.G.制作、押井守导演个同名动画电影国际高头名声大噪。从2002年到2006年间，Production I.G.又推出神山健治导演个一系列动画电视搭著押井守导演个两部动画电影。
虽然士郎正宗个漫画、押井守个动画电影、神山健治个动画电视内容、风格各有不同，，但每一版本个《攻壳机动队》侪因为出色个剧情、高质个画面搭著对哲学、社会学等深刻问题个探讨而受到普遍好评，常庄认为是日本动漫搭网络破格个经典代表作。
名称
编辑“攻壳机动队”一名属于和制汉语，来自日语原名“攻殻機動隊”，意思是“装甲机动防暴警察”。士郎正宗原作起个名字是英语“Ghost in the Shell”，只不过在出版辰光杂志社考虑受众拣了日语名，英语名变成功副标题。
概要
编辑故事个背景舞台设定拉2040年代个虚构日本城市新滨市，经过第三次、第四次世界大战洗礼个近未来科技已经好拿人类大脑改装成搭具有联网功能个电子脑，别样身体器官呢侪好用生化电子义体代替。人类社会个全面义体化（电子化）虽然带来巨大个便利，但也弗可避免个催生出新个犯罪方式——电子犯罪，日本政府因此专门成立直属首相个特别情报机构“公安九课”（即“攻壳机动队”）来应对。女主角草薙素子自幼就全身义体化，装备顶先进个军用义体，来拉电子世界里如鱼得水，是出色个骇客。2029年正式成为公安九课课长，並以卓越个指挥能力获得队员拉个信赖，通常亲切称为“少佐”。
比较《攻壳机动队》个弗同版本，士郎正宗原著个漫画以短篇单元剧为主，人物通常比较轻松幽默，剧情也没哪恁复杂，但往往有得探讨研究各种科技或社会问题个大段对白文字，个咾分类辰光属于青年漫画而非少年。押井守导演个动画电影就交关严肃，人物角色完全呒没漫画里轻松个儿童个性，以探讨深刻个哲学话题为主，电影整体也营造出一种沉闷、昏暗、略显悲观个氛围。神山健治导演个动画电视则大至介于两者之间，好算含有大量政治剧情个科幻警察刑侦电视剧。
《攻壳机动队》系列因其网络破格並带有反乌托邦性质个世界观著名。作品中对于未来科技有著精密个设想、考据搭描绘，交关概念今朝已经变成现实，《攻壳机动队》也因此获得了众多硬科幻爱好者个赞赏，並对后世交关科幻作品影响交关。沃卓斯基姐妹承认正是因为受到押井守个《攻壳机动队》个直接启发再创作出著名个《黑客帝国》系列。神山健治2004年个《攻壳机动队：S.A.C. 2nd GIG》关于难民问题个设定也来拉十年后个欧洲移民危机里反映出来。
人物
编辑- 荒卷大辅（Aramaki Daisuke）
- 公安九课部长，义体化程度极低，负责九课管理工作，关键辰光用政治手腕帮九课摆平行政高头个麻烦，受到全课敬重。
- 草薙素子（Motoko Kusanagi）
- 公安九课队长，人称“少佐”，全身用义体化个生化人，战斗力、黑客能力侪是全课顶强个，指挥能力高超，是九课个精神领袖。
- 马头（Batou）
- 公安九课成员，九课里向义体化程度仅次于素子，战斗力仅略逊于渠，是九课行动时个第二把手。
- 户草（Togusa）
- 公安九课成员，义体化程度极低，只有脑部作过电子化处理，本生是警视厅搜查课特务班个侦探，个咾刑侦能力极高，常庄搭马头一淘行动。
- 石川（Ishikawa）
- 公安九课成员，情报战专家，来拉建立防火墙、黑客入侵、制作病毒疫苗、情报收集搭分析方面具有卓越个能力。
- 斋藤（Saito）
- 公安九课成员，狙击手，仅有少量狙击需要个义体化，左眼来拉战争中打瞎后换装鹰眼系统，好搭卫星连接进行精密狙击。
- Paz
- 公安九课成员，熟知日本黑帮搭各種犯罪组织门路，拥有优秀个潜入侦查能力。
- Borma
- 公安九课成员，炸弹专家，擅长爆炸物处理，常庄搭石川一淘进行情报收集分析。
- 傀儡师（Puppeteer）
- 神秘个超级黑客，好入侵人家电子脑之后篡改其记忆，让渠变成为渠效力个“傀儡”，渠个真实身份像煞直接涉及日本政府。
- 笑面男（The Laughing Man）
- 神秘个超级黑客，好入侵到所有人个电子义眼搭监控设备里，用一张“笑面男”个图片挡牢自家面孔，像煞搭一系列商业电子恐吓事件搭界。
- 九世英雄（Hideo Kuze）
- 日本右翼恐怖组织“个别十一人”成员，发动著多起针对亚洲难民个暗杀搭爆炸，仔细调查后发现真实身份远非恐怖分子介简单。