查理一世（英格兰）
（从查理一世 (英格兰)转戳到箇里）
查理一世（1600年11月19号-1649年1月30号），是17世纪统治英格兰王国、苏格兰王国搭爱尔兰王国个君主。1625年3月27号接替爷詹姆斯六世搭一世继位，一直统治到1649年伊畀共和叛军处决为止。
查理一世是詹姆斯六世搭一世个二儿子。1603年跟牢爷搬到伦敦。1623年，伊搭伊拉爷个男宠白金汉公爵一淘到西班牙求婚失败，之后转向枪类反西班牙个策略。1625年，伊搭法国波旁家族个何丽婷娜公主结婚。个能，也建立起搭法国越加亲密个关系。
查理一世在拉继位之后，弗多几时就开始搭英格兰国会别苗头。伊自称君权神授，要求英格兰效仿欧洲别他君主国，建立常备军并允许国王公开征税。弗过，国会弗批准迭个建议，加上国会当中个清教徒对伊个天主教信仰邪气反感，乃么是互相越加看弗入眼。个能，查理一世就立在1630年代解散议会，执行长期乾纲独断，独裁统治。
弗过，到1630年代末，查理一世看见西班牙形势弗妙么极煞哉，想趁机到欧洲大陆去参战咾获得利益。为仔个军费问题，只好重新召开国会。弗曾想，迭个国会结果会得变成功反对伊自家个大本营。1640年代初，查理一世捉捕国会议员未果，就跑出伦敦，到英格兰北面公开招募军队勤王，对国会军队开战。
英国内战结束之后，查理一世畀捉牢，关押。当中越狱失败，乃么军队对伊邪气厌恶。1648年年底判处死刑，1649年1月遭到斩首。直到1660年，通过斯图亚特王朝复辟，伊再得着仔体面安葬。伊也是英国历史浪唯一一位畀国会杀脱个国王。