王光讓

王光讓（越南閒話：Vương Quang Nhường，1902年1月1日—1962年5月）是越南律師，渠當過越南國個國家教育總長、總理助理總長搭司法總長。渠還是阮朝成泰帝個女婿。

王光讓 Vương Quang Nhường
个人资料
出生	(1902-01-01)1902年1月1号 法屬交趾支那塸䲲省安良東
逝世	1962年5月 越南共和國西貢

生平

1902年1月1號，王光讓出生在越南南方（箇辰光是法屬交趾支那）塸䲲省個安良東。

王光讓有在越南搭法國讀書，接受了公法、私法搭政治經濟學個高等教育。1903年，王光讓以論文《印度支那的法律衝突》（Des conflits de Lois en Indochine）擔着巴黎大學個法學博士學位。有在巴黎個一爿律師事務所實習了一段辰光之後，王光讓在1931年8月份回到交趾支那，在西貢個一爿律師事務所裏向做生活。

1935年，王光讓加入法國國籍。

1945年3月9日日本人在印度支那發動政變之後，王光讓在西貢當檢察官，外加搭日本領事搭南圻長官合作。1947年，王光讓搭另外一批越南名人一淘，簽署了一份《西貢－堤岸地區越南知識分子個宣言》（Manifeste des intellectuels vietnamiens de la région de Saigon Cholon），呼籲要法國人搭越南民主共和國政權進行談判。1949年，王光讓貤簽署了另外一份呼籲法國人搭胡志明進行談判個宣言。

1950年1月份，阮攀龍當越南國個首相，渠任命王光讓作國家教育總長。

1950年6月份，王光讓畀越盟槍手槍擊。

1962年5月份，王光讓在西貢去世。

自家生活

王光讓搭亨麗埃特·裴個婚禮

1935年，王光讓搭小朋友裴光昭拉女兒亨麗埃特·裴光昭（越南頭一個女醫生）結婚。兩家頭拉1937年離婚脫哉。

後末來，王光讓貤搭阮朝成泰帝拉十六女良茵（Lương Nhàn）。1947年，通過王光讓個幫忙，箇位畀法國人廢黜搭流放個皇帝總算好回到越南。