王夫之

王夫之(1619年-1692年,即万历四十七年-康熙三十一年),字而农,号姜斋、又号夕堂,或署一瓢道人双髻外史,自署船山病叟南岳遗民,晚年隐居拉石船山麓,所以,也有蛮多人拿伊称呼为船山先生或者王船山。

王夫之像

生平编辑

凄惨一生编辑

同毛泽东祖先一样,王夫之个祖宗老早也是从江浙地区迁移到湖湘地区个明初军户。17世纪初,王夫之在拉湖广衡阳县(乃朝湖南省衡阳)一个小地主屋里出生,伊出生之后几年,因为自家爸爸在拉北京国子监学习,所以伊也就坚定要走科举做题目当官个老路。弗过,之后,因为李自成攻陷北京,以及之后个清军入关,伊个人生轨迹发生交关大个变化,到1650年代之后,伊放弃参与反清活动,跑到湖南深山老林当中躲起来,当明王朝个遗民,并且隐姓埋名,写出交关本书籍。主要包括《周易外传》、《黄书》、《尚书引义》、《永历实录》、《春秋世论》、《噩梦》、《读通鉴论》、《宋论》之类。个辰光,王夫之也晓得,自家写个内容,有交关是清帝国弗允许发行个,所以讲:

吾书两百年后始显

也因为弗曾公开出版自家作品个原因,王夫之实际浪在拉19世纪之前侪无啥名气,同顾炎武、黄宗羲,完全弗好相提并论。

发现王夫之编辑

王夫之个名声得到发扬光大,主要是19世纪湖湘地区士大夫本身努力个成果。19世纪中叶,曾国藩、左宗棠、郭嵩焘、胡林翼等湖湘有名个士大夫,侪通过对王夫之手稿个重新阅读,从当中寻到自家需要个内容,王夫之强调个经世致用,也邪气为伊个后辈老乡看重。所以,到1870年代,王夫之伴随湘军个成功,也成功获得清帝国认可,畀当成湖湘著名儒学家纪念。

再后来,到19世纪挨末阶段,王夫之作品当中个排斥非汉族思想,又畀新一批湖南地区个知识分子拿过来,当成功自家革命推翻满清个历史依据。个能,王夫之个名声,就更加响亮,最后,成功同顾炎武、黄宗羲一道,畀构造成【清初三大儒】哉。