百济

百济（韩语：백제）（前18年－660年），又叫南扶餘，是上古后期到中古早期，勒朝鲜半岛西南面建立个一个王权势力。

历史

百济个王族，自家讲是东北亚来个扶余人。传说公元前18年，高句丽太祖朱蒙个儿子温祚、沸流带领一批高句丽人南下到汉江盆地建立起百济国。

公元10年开始，百济来勒马韩部落里向保持强势，构成当地个社会上层，而原住民马韩只好成为百济个底层。三国史记当中写到，百济君王交关趟讲自家来自朱蒙，而且百济王室，侪用扶余作为自家个姓，甚至一度改国号为南扶余。

5世纪，高句丽南扩，百济个北方土地畀高句丽占领，弗得弗迁都到熊津（乃朝韩国忠清南道公州市）。百济开始同中国南齐建交，还跟新罗联姻一道对抗高句丽。532年新罗兼并特伽倻后，来勒朝鲜半岛上头百济搭高句丽，新罗三足鼎立，箇段辰光叫朝鲜三国时代。

538年，圣王迁都去泗沘（乃朝韩国扶餘郡），改国号叫“南扶餘”。

660年，唐同新罗联合，对百济发动攻击。百济首都泗沘畀攻克，百济畀新罗吞并。百济王族畀抓到唐朝个洛阳，同年，百济王死脱，葬勒邙山孙皓、陈叔宝个陵墓边丄。

一批百济贵族逃往日本，想联络大和朝廷，重建百济，得到大和朝廷支持，但勒663年“白江口之战”当中畀击败，之后百济贵族定居日本，逐步同日本上层融合。

大多数朝鲜三国个地图，侪拿百济个疆土包括乃朝韩国个忠清道搭全罗道。这也百济熊津时期泗沘时期个核心地域。

满洲源流考说百济一开始来勒辽西，畀高句丽打败以後退进南韩。隋书卷81中又讲新羅國个王是百濟人，跳海逃去个新羅。一开始伙同新罗打高句丽，到末期弗断同新罗打仗。

372年，百济近肖古王曾向晋朝朝贡。429年，百济派使团到宋寻求文化技术。472年，百济盖卤王派使团去北魏寻求打高句丽个军事援助。百济武宁王搭圣明王多𡍲派使团到南梁，武宁王个坟也是按照南梁个墓室风格造个。

百济搭日本，关系一直邪气好，东亚大陆个文化，包括：汉字、佛教、制陶技术、建筑技术等，侪是通过百济传入日本。同时，百济得到日本个物资搭军事援助，获得日本支持对抗新罗。

交关百济王族搭贵族成员，同日本皇族通婚，日本天皇自家也承认，祖先当中有百济个血脉。