硅谷银行倒闭事件

2023年3月10号，碰着挤兑个硅谷银行宣布倒闭，箇是2008年次贷危机以后顶顶大个银行倒闭案，也是美国史浪第二大个银行倒闭案。

新冠疫情个辰光，科技行业增长迅速。2021年存款大幅度增加个辰光，硅谷银行用箇些铜钿买仔交交关关个长期美国国债。必过，美联储为仔抑制通胀飙升，伊提高利率，让箇些债券个市值缩水缩脱交交关关。同时，更高个利率导致企业个贷款成本更加高，箇咾有弗少个硅谷银行客户开始选择从银行里取出存款来满足伊拉个资金流动需求。为咾筹集现金满足箇些存款人个提款需求，2023年3月8号，硅谷银行宣布伊卖脱价值超过210亿美元个证券，还去借仔150亿美元，还会得紧急卖出伊部分个库藏股。箇只公告一出，再加浪硅谷投资者个警告，让硅谷银行碰着挤兑，3月9号一天里向，伊拢总畀取出420亿美元。

2023年3月10号上半天，加州金融保护搭创新部查封脱硅谷银行，拿伊摆拉美国联邦存款保险公司个接管下头。箇家银行夯吧啷当1720亿美元个存款负债里向，约码89%超过联邦存款保险公司所能承保个最高限额。

接管计划失败两天以后，美国联邦存款保险公司获得美国财政部个特别授权。伊跟其他机构一道宣布，所有个存款人侪好勒拉第二天早浪向完全使用伊拉个资金。伊拿倒闭个硅谷银行重新开放成一家新组建个过桥银行——“硅谷过桥银行（Silicon Valley Bridge Bank, N.A.）”。

影响

硅谷银行个倒闭对美国同海外个初创企业造成严重个影响，弗少公司侪取弗出钞票，影响伊拉个资金流动。