第一代威灵顿公爵亚瑟·卫斯理

亚瑟·卫斯理（Arthur Wellesley，1st Duke of Wellington，1769年－1852年)是出身爱尔兰岛个英国贵族、军事家搭政客。因为立在滑铁卢战役当中拿拿破仑一世彻底击溃，终结拿破仑战争出名，是英国个国家英雄。

早年

伊来自一个小贵族家庭，年轻辰光就加入英军。1793年，前往荷兰参加对法国大革命之后革命军个围剿，军衔中校，弗过，因为发寒热病倒，但立在战争当中学到蛮多有用个事体。1796年晋升上校，1797年1月，畀派遣到印度，投身南亚个殖民事业。立在第四次英迈战争当中表现出众，并立在之后第二次英马战争当中拿马拉地帝国大军歼灭。1804年，伊弗想继续蹲在印度，申请回到英国并结婚。1805年，伊参加短暂又失败个丹麦远征，弗过无多少损失就回到英国，之后，前往伊比利亚半岛，开始伊传奇性个半岛战争。

半岛战争

个辰光，半岛战争已经开始，西班牙畀拿破仑彻底占领，并扶持自家个阿哥约瑟夫波拿巴当上西班牙个傀儡国王。法国个军队逼近葡萄牙，因为葡萄牙是英国个盟友，所以英国决定出兵帮助。威灵顿立在葡萄牙布置精妙个防线，让法国人好几趟嘸办法前进，这种防线后势来又畀叫做威灵顿之线。1811年，法国人基本撤出葡萄牙，1812年开始，威灵顿带领葡萄牙盟友，立在西班牙游击队个配合下，开始反攻，并强行拿巴达霍斯攻克。法国人为此放弃安达露西亚。个辰光，交关人侪建议威灵顿直接进攻马德里，弗过伊因为自家攻城武器有限，作罢，又返回葡萄牙。1813年，威灵顿重新发动攻势，声东击西，立在维多利亚之战（Battle of Vitoria）当中拿西班牙傀儡部队搭法国人彻底击溃。之后威灵顿越过比利牛斯山脉，直接进入法国南部，并立在图卢兹战役当中拿法国元帅苏尔特击溃。立在迭个辰光，正好传过来拿破仑一世退位个消息。威灵顿成功凯旋，并因为自家个战功确立老大个名声，畀册封为威灵顿公爵。同时，伊直接畀任命为驻法国全权大使。

滑铁卢战役

1814年威灵顿前往维也纳参加维也纳和会，1815年3月，拿破仑偷渡法国，重新篡位，建立百日王朝。威灵顿授命重新组织军队对抗迭个野心家。因为手头个老兵有限，伊调集蛮多汉诺威王国个下萨克森人作为伊个德意志军团补充力量，又让个辰光立在英军当中个荷兰王子招揽荷兰军队作为补充。个能，凑齐一只几万人个部队，搭伊个普鲁士盟友布哈德·莱贝雷希特·冯·布吕歇尔元帅个军队开始向拿破仑个军队挺近。拿破仑个部众侵入比利时，立在林尼战役（Ligny）当中拿布吕歇尔击破，又立在几天之后，对威灵顿个部队进行一场小规模个四臂村之战（Battle of Quatre Bras）。法军去的战术胜利，威灵顿撤离到靠近布鲁塞尔个一条山脊浪，驻扎地就立在小镇滑铁卢南面。6月18号，决定性个滑铁卢战役爆发，威灵顿立在一天当中成功守住法国人个狂攻，到傍晚，本身畀认为弗会出现个普鲁士军队前来合围，拿破仑个部队崩溃，法国人南窜逃亡，威灵顿获得对拿破仑个胜利，并通过迭个战争彻底树立自家个威名。拿破仑战争也立在当天宣告终结。

余生

击败拿破仑个壮举让威灵顿收获邪气高个威望，伊收到欧洲五个国家个元帅头衔，并畀加封交关贵族称号，1819年，伊开始进入英国保守党个政府，弗过立在军队当中影响力一直朆衰减，1827年伊担任英国陆军总司令直到死脱。1828年，威灵顿成为英国首相。弗过，相比伊个军事成功，伊对政治并弗是十分得心应手，立在担当首相个辰光，因为选举权扩大问题，搭自家内阁有蛮多冲突，威灵顿是保守主义者，本身对激进思想相当厌恶，弗过伊又认为弗做出一点妥协是嘸办法适应1830年代个社会个。伊对选举权搭爱尔兰问题浪个固执让英国保守党立在1830年代分裂，并因此终结从小威廉皮特开始个长期执政。

威灵顿立在1846年之后彻底退出政坛，弗过继续拥有英军总司令个头衔。1852年伊去世，大英帝国把伊国葬个哀荣，伊出殡当日，前来瞻仰个老百姓多到嘸站立个地方。威灵顿畀安葬在圣保罗大教堂地下墓室核心地点，搭英国海军传奇人物纳尔逊子爵享受同样个尊崇。