米麵

米麵，也謳作米乾、面乾，是台州特有个傳統主食之一，是一種用稻米做起个線狀、透白个麵類食物。

做法

傳統上，米麵要經過「雙蒸雙熟」工藝，箇包括爻磨浆、压浆、搓果、蒸、搓軟、压丝、再蒸、松丝搭曬燥。從蒸籠擐出，要畀迫在佐隊个麵用手搓散，再好掛竹梗上頭，箇便是松丝。松好曬上一日，便做好爻，替做起个麵，好囥一年。

燒法

米麵个喫法多險，頂有名是炒米麵搭薑湯麵。

做炒米麵，要先開水燙軟米麵，赫撩起松燥，加油（也好用豬油渣炒油）搭醬油拌起。熱鑊炒好雞蛋、豬肉絲，加麵炒，按個人喜好加再上海鮮、包心菜、豆腐乾許，炒到醬色炒勻便好加蔥花出鑊爻。

薑湯麵便是用薑湯煮米麵。赫要加進去海鮮，比方講蝦、蟹、小黃魚、蟶、蛤蜊，還好加肉絲、臘腸、青菜、香菇。薑湯麵湯是金黃色，喫起有暖胃个感覺。

風俗

米麵在台州經常作禮品，畀認為有儀式感。

佢價錢弗貴，卻情是親眷朋友之間送物事个嘉品。住新屋、老倌老太做壽、大娘坐舍姆、過年串門个時節都好送米麵，有時還贴上大紅紙條。