苏白

苏白，字面浪个意思就是苏州白话，也就是苏州口语，即评弹苏州言话。

影响

苏州言话长期以来一脚是吴语个代表方言，也是汉语方言里向顶顶早畀研究个一种方言，相关个研究成果也相对比较丰富。

苏白勒浪历史浪有过交关重要个影响。通行勒浪北部吴语地区个苏州评弹（包括评话搭仔弹词），用个也就是苏白。苏白也是昆曲里向丑角常用个闲话（相对个，北昆常使用“京白”）。

勒浪历史浪一脚到民国，吴语小说几乎侪是用苏白写个，作者也弗一定是苏州人。

苏白对上海闲话个影响也交关大。

勒浪历史浪向，根据《松江府志》记载：明代是“府城视上海为轻，视嘉兴为重”，到仔清朝已经是“府城视上海为轻，视苏州为重”。

现代上海话勒浪俚个形成过程当中，也畀苏白强烈影响，特别是表现勒浪发音浪向，外加是明显。勒浪一定程度浪，可以实梗讲法：上海本地言话基本浪已经畀苏白消灭脱哉，取而代之个是苏州味道浓重个新上海话。

苏白也畀赋予仔江南个特殊味道。金庸（浙江海宁人）个武侠小说《天龙八部》里向，阿朱阿碧就讲一口苏白，拿江南少女个灵动搭仔秀气刻划得活灵活现。

此地所谓个“使用苏白”，並弗一定是完全用苏白来写，有些儿是夹用苏白搭仔官话。