西国枪阵
西国枪阵(西文：tercio）是近世有名个一种战斗阵型。是15世纪挨末阶段，西国大元帅阔多瓦发明个作战方式。迭个阵型结合当时欧洲战争当中个特点，让火绳枪兵搭长枪兵结合，发挥出攻击搭防御个顶大效率。拿十六世纪到17世纪当中阶段，西国枪阵成为欧洲顶顶流行个军事编制。伊个发源地西班牙，依靠迭个阵型搭高素质个军队，建立百战百胜个强大部队，威权笼罩欧洲。
流行搭衰落
编辑西国枪阵个流行，搭迭个辰光火绳枪个特点有蛮大个关系。因为火绳枪重量大，装填弗是老方便，所以只好让火绳枪兵专门负责射击，并要求大量防御部队对伊拉保护。个能，就拿文艺复兴辰光开始重新发展个古典时代长枪阵搭新兴个火药技术结合，进攻辰光使用大量火枪手射击，到推进、对峙或者防御阶段，就让火枪手退缩到长枪兵密集个防御后头装填，或者拿出匕首发动偷袭。这也符合16世纪欧洲个战争状况。
弗过，到八十年战争之后，立在弗兰德斯个河浜之中，西国枪阵体量太大个毛病就展现出来，荷兰执政，威廉奥伦治个儿子拿骚个莫里斯就发明出散兵阵对抗西国枪阵。到三十年战争当中，长枪阵个问题伴随近代骑兵个出现以及火枪制造个进步，更加暴露。本身个进退有度，变成攻防转换缓慢个问题，到三十年战争挨末阶段，西班牙军队个胜率就一直下跌。到1659年西法战争结束之后，长枪阵立在欧洲就弗是主流哉。到西班牙王位继承战争之后，欧洲普遍开始使用单纯依靠燧发枪配上刺刀个线性阵型，西国枪阵退出历史舞台。