许逊
许逊（239年－374年），字敬之，是东亚大陆在拉上古挨末阶段一个有名个道士。
生平
编辑伊是南昌县（江西）长定乡益塘坡人，听讲祖籍是河南汝南(也讲弗清爽到底是真是假），勒西晋太康元年（280年）当过旌阳（现在四川一个地方）个令。勒迭个阶段，就传言伊拥有“点石成金”个法术，一旦收税不足，伊就拿石头变成铜钿。元康元年（291年）晋帝国爆发八王之乱，许逊离开四川，回到老家，勒豫章地区传播自家个思想。伊回到江西个辰光，彭蠡湖（今鄱阳湖）水灾连年，伊就带领郡民去防备灾害，足迹踏遍湖区各地。弗单单为豫章治水，还到湖南湖北、八闽等地方，去消除水患，得到老百姓拥护。
许逊手下头有十二个徒子徒孙，名号叫做西山十二真君——许逊、吴猛、时荷、甘战、周广、陈勋、曾亨、盱烈、施岑、彭抗、黄仁览、锺离嘉。迭个宗教团体以南昌西山作为中心开始传教，伊拉个活动，散播整个豫章搭周边地区，甚至岳州个平江（现在湖南平江县）也有伊拉传教遗迹。
许逊个活动，让伊赢得交关声望，同迭个辰光其他道教团伙一样，逐渐也产生交关围绕伊个神话故事，比方讲伊好用铁柱镇魔，杀蛟斩蛇之类。到六朝辰光，许逊已经成为江西地区有名个当地土神仙，老百姓讲伊“传孝道之宗”，“为众仙之长”，“，并且认为伊搭伊个徒子徒孙，侪好驱逐蝗虫，化险为夷。
东晋宁康二年（374年）八月十五号，许逊“阁家飞升，鸡犬悉去”。
崇拜
编辑从唐帝国开始，对许逊个崇拜逐步变成一种正式行为。到宋朝，在拉汴梁当局引导之下，许逊彻底成为真正畀认可个官方神仙。
宋真宗大中祥符三年（1010年），汴梁朝廷下令，拿南昌西山个游帷观升格成玉隆宫。宋徽宗辰光，又对许逊上尊号“神功妙济真君”。到南宋，“真君垂迹，遍于江左湖南北之境，因而为观府、为坛靖者，不可胜计。”。
传说中，闽东一带个女神，闾山道教三奶派宗师“临水夫人”搭法主派宗师“法主真君”，就是从闽江底个神秘世界闾山，拜许逊为师个。
成为族群符号
编辑到明帝国搭清帝国统治阶段，许逊畀直接叫做许真君，并且成为江西人到啥地方侪要崇拜个顶重要神灵。江西人做生意，考科举到外地，一定要寻地方修造许真君庙宇，成为联络江西老乡个集中据点。也因为迭个原因，从上海、北京到广州，到处侪存在过许真君庙，可惜大部分已经寻弗到啥遗迹哉。现在，就勒南昌或者江西省内，还保留一些许真君个庙宇。