黄巾之乱
黄巾教乱(吴拼：Wong-King Kau-Loe），一般也好叫黄巾之乱，是公元2世纪东汉帝国阿末阶段一趟邪气结棍个宗教战争。居场战争从184年（汉灵帝光和七年）开始，一直延续著五年。战争个头目是河北人张角搭渠个阿弟张宝、张梁。汉帝国个权威在居场战争当中灭脱，弗同地区个土豪，靠平定叛乱咾崛起。到战争结束辰光，帝国境内有交交关关军阀，形成割据局面，后势来三国个格局，也奠定著基础。
爆发缘由
编辑黄巾教乱，一方面是宗教战争，另外一方面也是世俗战争，汉帝国辰光，五行八卦邪气风靡，后首来个道教，开始形成。到汉灵帝辰光，天灾人祸邪气多，土地兼并蛮严重。老百姓苦头吃足，对朝廷弗满意。张角根据乡下头元本个信仰，结合渠自个理论，创设著太平道，讲天上个鬼神会帮老百姓报复朝廷。渠个信徒多起，到战争开始之前，引发著东汉朝廷注意，张角发觉苗头弗对，便号称“苍天已死，黄天当立”，开始发动大规模战争。昰只由来，搭后首来个天平天国是有眼类似个。
战争经过
编辑迭起
编辑光和七年三月五号，张角讲苍天死脱著，渠太平道个黄天要开始新纪元，便号召信徒兴兵反汉。根据许歇行个五德始终讲法，后汉是火德，火生土，土是黄色，盖咾信徒就全担黄颜色个头巾缚在自骷䯖头丄，昰然，便䜒黄巾军。张角担渠自称谓改成功天公将军，渠个阿弟张宝、张梁分别是地公将军、人公将军。四面出击，在渠自个基本盘冀州寻事体。之后一只月里向，汉帝国核心地区廿几只郡县全出事干，后汉个官兵全科无能力应付昰场宗教战争，东汉朝廷震动。
土豪镇压
编辑东汉朝廷开始也想用渠自个军队走平定叛乱起，却情，因为本生中枢机构崩坏，效果邪气推板。大臣皇甫嵩对灵帝讲，衹有解除党锢，再好担黄巾贼平定。汉灵帝心里向对黄巾军也貤加吓，便大赦儒生，要求各公卿自家招兵买马，帮朝廷对付黄巾军。
居歇，张角在河北搭卢植对峙，皇甫嵩搭朱儁带领各地个土豪咾勇士，在颍川(乃朝皖北阜阳市）围剿黄巾军。吴越人孙坚投奔到渠场军队里向，得著司马头衔，富阳孙氏个发家就此开始。
几个月后，黄巾军局面并弗吃紧，皇甫嵩搭朱儁还在颍川弗好动。颍川居歇是苏州后首来个地位，万一陷落，局面就邪气难看。昰然，东汉朝廷貤加吓，就担兵权畀曹操，喊渠救援[[皇甫嵩搭朱儁。然介三面夹击，黄巾军惨败。之后，张角在河北打卢植弗过，但弗过卢植畀汉灵帝怀疑谋反，捉转去，黄巾军在冀州貤重新猖獗起。
叛乱平定
编辑到秋天后，黄巾贼个形式推板爻，蛮多人开始搭朝廷投降。九月，张角生病死脱著；十月、十一月，张宝、张梁也死脱著。到年底，黄巾主力全灭脱著。
影响
编辑黄巾教乱之后，本生帝国禁锢个儒生士族开始彻底崛起；同一辰光，交关在战争当中有功劳个小土豪或者流窜团伙，也得著渠自个势力范围。小土豪个代表是孙坚之类，流窜团伙个代表是刘备咾啥。此外，本生在朝廷里当官个一眼人，也隑著黄巾乱中个兵权，开始有自家本钿。典型代表就是后首来三国顶大个军阀、挟天子以令诸侯个曹孟德。之后无几许年数，东汉朝廷就名存实亡，盖咾蛮多历史小说也担黄巾教乱当成三国个开始。