黎黄氏事件
黎黄氏事件，貤叫大闹会审公廨案，发生勒1905年（光绪三十一年）12月份个上海。一名广东籍已故小官僚个遗孀黎黄氏带仔小辈同15名婢女从四川乘招商局个轮船回广东，路过上海等船去广东个辰光，上海公共租界巡捕房巡捕想敲竹杠弗成，就用贩卖人口个罪名拿黎黄氏关到牢里向去。公共租界会审公廨来勒审理箇桩案件个辰光，英国领事下令判罪，会审官金绍城则认为案情真相弗清弗爽个，弗好直接判案。经共同调查，黎黄氏的的确确弗勒贩卖人口，故咾会审官金绍城要求英国领事释放黎黄氏，遭到英国副领事个拒绝。公共租界会审公廨审理个辰光，又发生中英两国会审官对女犯人应该关勒啥地方个争论，外国巡捕直接打同肏铲中国会审官金绍城，还动手抢犯人，引起旁听群众个公愤。上海居民对本国官员受辱反应强烈，到处围打巡捕，放火烧脱老闸捕房。虞洽卿作为代表同租界当局交涉，据理力争，再加上商人罢市，工人罢工，租界华人巡捕罢岗，迫使英方让步，通过上海道袁观海、工商界人士朱葆三、虞洽卿等人出面调解，一面释放黎黄氏，一面劝令华商开市，规定“今后一律由中方巡捕到会审公堂维持秩序”。会审官金绍城因为箇桩事体罢官。[1]
参考
编辑- ↑ 金绍城，中国南浔，于2011-11-13查阅. 原始文档勒2011-07-22存档. 访问日脚2011-11-12.