2024年上海地铁11号线履带吊撞击事故

2024年12月22号上半天7点56分，一台履带吊车意外转进上海轨道交通11号线南翔站到陈翔公路站区间个轨道浪，帮路过个列车碰勒一道。事故里向呒没人受伤，必过地铁个接触网受损严重，弗得弗停运。事故区间经过抢修，列车两只方向分别来勒当天夜里向21点30分左右帮22点50分左右恢复运营。

背景

11号线

上海轨道交通11号线是上海地铁个一条地铁线，全长82公里，曾是世界顶长个地铁线路，是嘉定、安亭等区域去上海个唯一地铁线路。

沪嘉-嘉闵联络线

沪嘉高速-嘉闵高架联络线新建工程是沪嘉高速改造工程个一部分，主线全长1.037公里，是高架快速路。工程沿咾真南路设置，西端有T形立交接嘉闵高架路，东端是T形立交接沪嘉高速。涉事个工程点位属2标，是东端立交北向西（NW）右转匝道，帮11号线并列设置。事故发生前，2标现场来勒当年7月份成功完成11号线正上方高架梁个吊装，用个是“钢梁分段运输至施工现场、现场搭设胎架组拼、整体起吊安装就位”个施工方案。现场有两台吊车参与施工，一台是400吨个履带吊，另外一台是130吨个汽吊。箇只工程由上海城投公路负责建设，施工单位是上海建工集团，监理单位是上海市市政工程管理咨询有限公司。

事故经过

上午7时56分，11073号列车经过事发区段开去陈翔公路站个辰光帮吊车撞勒一道，车窗玻璃碎脱，弗得弗停勒区间里向；涉事吊车畀水泥块压扑勒现场。事件造成线路个接触网断脱，护墙敲开一段约5米个豁口。事发以后，因为停电，车门也打弗开，救援人员打开门以后组织乘客沿咾高架走到陈翔公路站。

运营方拿11号线运营区间调整成嘉定北站到马陆站、花桥站到马陆站、武威路站到迪士尼站三段。久事公交帮嘉定公交一道开仔五条短驳线，分别从安亭站、嘉定北站、嘉定新城站、陈翔公路站、南翔站始发，直达武威路站。约莫14点50分，事故列车畀工程车拖离现场。申通地铁一开始表示事故区段受损严重，有可能会得影响第二天早高峰。必过经过抢修，去迪士尼站方向来勒当天夜里向21点30分左右就恢复运营哉，去嘉定方向列车也来勒22点50分左右恢复运营。

调查

事故发生以后，应急管理部立时三刻联系上海市应急管理局、消防救援总队搭仔事故现场，指挥救援工作，要求上海市相关行业开展安全检查。上海市提级调查箇桩事故。