三林体育中心

三林体育中心，老底子是浦东棒垒球场、上海康贝棒垒球场，来勒上海市浦东新区云莲路201号，1996年8月份造好，当时伊个辰光球场里向有1片垒球场1片棒球场，还有训练场。1998年8月份，球场由康贝上海有限公司托管以后，改叫浦东康贝棒垒球中心，增添篮球场、乒乓室、桌球室咾啥个体育设施。浦东棒垒球场曾承办中华人民共和国第八届运动会个棒垒球比赛，还先后举办第七届亚洲女子垒球锦标赛、全国棒球锦标赛、上海国际垒球邀请赛、全国棒球联赛等赛事。2004年，中国棒球联赛也来勒箇块比赛场举行。

康贝棒球场来勒2008年畀拆脱，后些来改造成三林体育中心。改造后个三林体育中心总占地面积约54930平方米、总建筑面积约70498平方米，有7层楼个综合训练馆、带两块专业冰面个多功能体育馆“飞扬冰上运动中心”、游泳馆、部分体育配套用房、地下停车库、室外健身步道、室外篮球场、室外足球场、市民健身苑点咾啥个设施。2017-18赛季，北京昆仑鸿星冰球队曾拿自家来勒KHL里向个主场设置勒三林体育中心，此外，2016-17赛季，昆仑鸿星也拿主场摆勒箇埭长达三只号头。2018年10月30号，三林体育中心全面对外开放。