上海延安高架路
上海延安高架路（英语：Yan'an Elevated Road[1]），是上海个一條東西走向个高架快速路，西起虹橋機場，東到外灘，全長15公里，分三段建設，三段工程橫穿市區[2]，全線基本沿牢延安西路、延安中路搭延安東路修建，爲高架及地面輔道形式，高架路爲雙向四車道，設計時速80公里。有匝道通往延安東路隧道。
歷史 编辑
西段 编辑
西段个主要功能是溝通起虹橋國際機場交內環高架路，服務虹橋開發區商務人士以及古北新區居民，全長6.2公里，全線配置上下匝道四對，路寬25.5米，設雙向6車道，並有進入機場个專用匝道。地面雙向8車道。勒1995年11月28號動工，1996年12月2號建成。後改建主線直通G50高速公路。
中段 编辑
中段是三段工程中頂晏建成通車个，其作用是連接南北高架路交內環高架路，全長5.56公里，高架爲雙向6車道，標準寬度爲25.5米。道路設計車速爲60公里/小時，共設5對匝道。勒1999年9月通車。
東段 编辑
東段西起南北高架路，東至外灘，長3.06公里。東段全線有匝道13條，搭西段、中段一淘溝通起虹橋國際機場以及外灘，勒迭一段高架道路浪行駛，好望著交關城市地標，邪氣壯觀。外加，東段有匝道連接起高架道路搭延安東路隧道，溝通起黃浦江兩岸，也是城市中頂重要个車輛過江通道之一。
亞洲第一彎 编辑
延安高架路東段原壓末一隻下匝道便是拐入中山東一路外灘个高架終點，由於車輛行駛勒箇下匝道个辰光好飽覽浦江風光，同時迭段高架勒地面浪看起來氣勢恢弘，素有“亞洲第一彎”美稱。
2008年2月23日，爲配合外灘通道修建，同時改善外灘景觀，延安路高架紫金路以東段封脫，同時拆脫亞洲第一彎。2008年6月6日，該下匝道完全畀拆脫。[3]
2009年12月1號，新个外灘中山東一（二）路匝道開始啟用。[4]
龍柱傳說 编辑
延安路高架搭南北高架交匯處，由一根巨大个圓形柱支撐。弗同於其他支撐結構，迭根柱周圍包裹著白鋼並有用黃銅鍛造个祥龍騰雲圖案。相傳90年代建造个辰光，迭一根頂主要个柱子个地基，打樁柱搖擺弗准，無論如何也打弗准預定个位置，而且連續打斷脫七根柱。後首來有人懷疑是動到了風水，乃末請來當時玉佛寺个真禪法師。真禪法師帶牢弟子連續念了三天經文，並主持了祭祀儀式，後首來个施工果然無比順利。真禪法師提醒講，上海个地下有一條龍，迭一根樁齊巧打勒拉龍背紫金路，告咾建造完成後，必須七天勒柱子周圍包覆銀底金龍个圖案。由於道破个天機，乃末真禪法師勒幾日後無疾而圓寂。雖然上海政府官方朆承認歇有請高僧念經祭祀，但是迭隻故事勒上海當地人裏向流傳邪廣[5]。
事實浪，箇個龍柱个裝飾系上海油画雕塑院个趙志榮爲建設方設計，原因是防止駕駛員因爲該超大立柱帶來个心理暗示導致交通事故[6]；至於打弗進樁基作興搭當時柱子建設勒杜月笙公館舊址浪搭界，讓地下條件比較複雜，而且佈樁密度忒高，加大樁體個摩擦係數，打樁個難度大大增加。[6][7]
上下匝道及沿線立交 编辑
- 虹橋機場連接線
- 外環高速滬渝高速立交
- 外環高速匝道（外灘方向上、虹橋機場方向下）
- 虹許路匝道（雙向上下）
- 婁山關路匝道（外灘方向上，虹橋機場方向下）
- 內環延安西路立交
- 凱旋路匝道（外灘方向上、虹橋機場方向下）
- 江蘇路匝道（外灘方向上、虹橋機場方向下；番禺路虹橋機場方向上，武夷路外灘方向下）
- 華山路匝道（外灘方向上、虹橋機場方向下）
- 茂名南（北）路匝道（外灘方向下、虹橋機場方向上）
- 瑞金一路（石門一路）匝道（外灘方向上、虹橋機場方向下）
- 延安東路立交
- 西藏中（南）路匝道（外灘方向下、虹橋機場方向上）
- 福建中（南）路匝道（外灘方向下、虹橋機場方向上）（可通往延安東路隧道）
- 中山東一（二）路匝道（外灘方向下、虹橋機場方向上）（連接外灘隧道）
參攷資料 编辑
- ↑ 上海市地名办 (2015-04-30). 上海市道路名称英译导则. 上海市规划和国土资源管理局. 访问日脚2023-02-16.
- ↑ “申”字型高架路：一隻大膽个創意 (zh). 上海市政公路資訊網 (2008-05-28). 原始文档勒2012-09-17存档. 访问日脚2009-12-08.
- ↑ 上海拆除“亞洲第1彎”(原載《中國新聞網》) (zh). 青島新聞網 (2008-02-23). 原始文档勒2016-03-04存档. 访问日脚2009-12-08.
- ↑ 延安路高架外灘下匝道恢復啟用 (zh). 新聞晨報 (2009-12-02). 访问日脚2009-12-08.[链接坏脱]
- ↑ 上海延安路高架“龙柱”之谜 (2016-12-29). 原始文档勒2017-01-01存档. 访问日脚2023-02-20.
- ↑ 6.0 6.1 安路"龍柱"衹是一隻傳說 樁打弗進去交杜月笙公館有.
- ↑ 姜开城. 细解上海南北高架“龙柱”之迷. 城市道桥与防洪. 2011, (3) [2019-02-25]. （原始内容存档于2012-10-25）.