临港新片区中运量系统
临港新片区中运量系统，简称临港中运量，是主要畀中华人民共和国上海市浦东新区临港新片区服务个数字轨道电车系统，目前也有普通公交车来套跑。现在拢总有3条运营线路，拢总有20座车站，运营里程47.95公里。（截止2024年1月）
规划历史
编辑临港中运量，最早可以回到2010年代。 2012年07月19号，时任上海市交港局局长孙建平讲，上海会得勒拉徐汇滨江、松江、临港新城、虹桥商务区等地方造一批快速公交、有轨电车等中运量公共交通[1] 。 2013年个辰光，曾经讲要勒拉临港搭世博区域造有轨电车[2] ，呒没啥结果。2016年，临港大道-环湖西三路-橄榄路-同顺大道-江山路个中运量公交通道畀确认，并提出预留未来改成大运量个条件[3] 。 2018年，公开仔5条、拢总约82公里个中运量公交线，所有线路侪可以换乘地铁16号线[4] 。 2020年4月份，《中国（上海）自由贸易试验区临港新片区交通提升三年行动计划（2020—2022年）》发布，线路数量加到6条，拢总约115公里；7月份头一趟提出“数字轨道电车”（Digital-rail Rapid Transit, DRT）个概念[5] 。 2020年8月18号上半天，首条线路T1线开工，规划一开始用纯电动运行，未来用氢能车辆[6] 。按照临港新片区个“十四五”规划，到2025年，临港中运量系统运营里程会得达到50公里以上[7] 。
技术
编辑轨道
编辑临港中运量用个轨道叫“数字轨道电车”，也叫“数字轨道磁钉技术”。箇个技术总体上搭智轨差弗多，也就是通过某种程序导向方式控制胶轮铰接公交车跟牢虚拟轨道往前跑。区别是，临港中运量主要用个是地面设置个磁钉做轨道指引导航，而非图像识别技术[8] 。箇系统同样是中国中车旗下个企业做个[9] 。
动力
编辑目前，临港中运量T1线采用超级电容个纯电动力驱动，而T2线搭仔未来个其他线路用个是氢燃料电池为动力，未来T1线也将改成氢动力[10] 。
线路列表
编辑
运营线路
编辑2023年7月1号，临港中运量T1线，T2线调整走向，以下信息是调整后个信息。 7月5号，3号线（规划建设个辰光叫T6线）开通运营，临港中运量头一趟进入奉贤区。
| 线路名称 | 开通日期 | 起讫站 | 车站数目 | 运营长度（千米） | |
|---|---|---|---|---|---|
| T1线 | 2021年6月30号 | 滴水湖 | 鸿音广场 | 11 | 21.75 |
| T2线 | 2022年10月28号 | 滴水湖 | 水华路 | 8 | 8.7 |
| T3线 | 2023年7月5号 | 飞渡路 | 草萱路 | 5 | 10.2 |
运营
编辑目前除脱滴水湖搭仔鸿音广场箇两座枢纽站，临港中运量T1线搭T2线个所有车站侪是勒拉道路中央个岛式车站，但是呒没像延安路中运量公交系统伊浪配仔有人行天桥，乘客需走斑马线穿过马路进站。两条线侪用2快洋钿个单一票价，享受公交、地铁换乘优惠。
评价
编辑临港中运量实际运营当中，车子颠唻邪气严重、速度又慢唻像老蜗牛，再加上沿线弗少地方还呒开发，乘客少，畀人批评浪费道路资源。官方从城市规划个角度畀出解释“适度超前”，必过呒没回复车子颠个问题[11]。
参见
编辑参考资料
编辑- ↑ "上海拟推快速公交和有轨电车 松江等地均在规划". 央视网. 2012-07-20.
- ↑ "临港和世博区域或建有轨电车". 青年报. 2013-04-09. Archived from the original on 2022-09-22. Retrieved 2023-01-25.
- ↑ "上海规划加密临港地区轨交：新增南港线，预留机场-临港线". 澎湃新闻. 2016-06-22.
- ↑ 浦东临港地区规划建设5条中运量公交线 未来都能与轨交16号线实现换乘. 周到上海 (2018-07-25).
- ↑ 数字轨道电车将亮相临港 对接轨交16号线，全长21.75公里. 人民网 (2020-07-16).
- ↑ "临港中运量T1示范线开工". 新民晚报. 2020-08-19.
- ↑ 上海市人民政府关于印发《中国（上海）自由贸易试验区临港新片区发展“十四五”规划》的通知. 上海市人民政府 (2021-07-26).
- ↑ "上海：临港中运量T1示范线今天起预约试乘".
- ↑ 数字轨道胶轮列车，在上海正式试跑. 澎湃新闻 (2021-01-04).
- ↑ 氢动力、自动驾驶、中运量，上海迎来全新一代公交车. 上观新闻 (2021-12-20).
- ↑ 栗思 (2023-05-22). "乘客少还占用专用车道？临港中运量频遭吐槽，记者实地探访真实情况". 上观新闻.