北冰洋（英語：Arctic Ocean）勒北半球，是北極邊浪北極圈範圍个大洋。畀歐亞大陸搭北美洲包牢，一面連牢大西洋，一面連牢太平洋。
北冰洋冬天畀冰凍牢。因爲蒸發得窮少，外加交關河儕流進去，所以鹹度勒五大洋裏向頂頂低。
北冰洋是世界五大洋裏向頂小頂淺个。面積1405.6萬平方公里，佔仔世界大洋面積个3.6%。平均深度1200-1300米，是世界大洋平均深度个三分之一，頂深个場許就5450米深。
因爲北冰洋大部分辰光儕結冰，航運活動窮少，外加面積亦小，有點人認爲北冰洋弗好算「洋」，叫俚「北極海」。
