南島民族

南島民族嚜，指大洋洲搭東南亞以南島語系爲語言个族羣。其中包括臺灣、東帝汶、印度尼西亞、馬來西亞、菲律賓、文萊、馬達加斯加、密克羅尼西亞聯邦搭波利尼西亞以及新西蘭搭夏威夷玻利尼西亞人、巴布亞人个美拉尼西亞人等多個民族。渠場還分佈在泰國北大年地區、新加坡、越南搭湛地區（覆蓋越南中部搭南部个占婆王國）、柬埔寨、海南。昰些地區統稱爲南島民族地區。

南島民族現代分佈

歷史起源

對於南島民族个起源搭擴散，學界根據語言學搭考古資料，提出爻幾種假說。

扩散

出台灣假說

學界認爲，由亞洲大陸移居至臺灣个族群，在臺灣形成爻南島語系，之後沿著島嶼，逐步擴展到太平洋各地。昰個假說嚜，畀稱爲出臺灣（Out of Taiwan）假說。昰個假說頂早由語言學學者提出，遺傳人類學者以粒線體DNA个研究，對昰個假說提供爻更多證據。昰個假說在學界有得交關支持者，但朆得到一致共識。

Shutler and Marck在1975年發表論文，認爲臺灣是南島語頂有可能个發源地以後，國際遺傳學界噶嚜接受佢个研究成果。尤其在1991年在《科學美國人》（Scientific American）雜誌裏向，Peter Bellwood就昰個問題个論文發表以後，「南島語个發源地在台灣」昰個陳述嚜，就幾乎已經是多數學者个共識哉；後首來佢再提出，南島民族由亞洲大陸而來，在公元前8000年左右到達爻臺灣，此後發展出卓越个航海能力，弗斷分批移民至海外島嶼；在開始老長一段辰光後，有曾暫止一瑲，然後貤持續移民，而無論是擇住在大島或小島，多遍佈在亞熱帶搭熱帶地區，昰個嚜是渠場个一大特點。

根據Bellwood个研究，操南島語个南島民族是由亞洲大陸而來，可能搭侗傣（Kam-Tai）民族或南亞（Austroasiatic）民族原是一家，分家後到臺灣來，年代大約模是6000年前。大約5000年前，纔開始從臺灣南下擴散到菲律賓群島，主要是北部呂宋一帶。然後到婆羅洲、印尼東部，時間大約是在4500年前。然後往東、西兩方擴散，東至馬里亞那群島（關島、塞班島一帶），也到爻南太平洋部份地區，往西到馬來半島、蘇門答臘等，辰光約在3200年前。再下一步纔擴散到中太平洋美拉尼西亞區域个加洛林群島一帶。然後往東，到玻里尼西亞壗頭去，約在公元300年左右。乃朝在新西蘭个毛利族（Maori），是頂晏个移民，約在公元800年。

昰個散布模型，可以用地瓜个傳播來證明，隨著南島民族往東遷徙，搭南美洲个美洲原住民接觸，擔地瓜由美洲傳播到環太平洋區。另一個證明嚜是太平洋構樹。2015年臺灣大學森林環資系搭智利共組研究團隊，分析西太平洋島弧丄个太平洋構樹樣本，發覺各地構樹搭南臺灣構樹全有相同个葉綠體基因單型（haplotype），西太平洋各地个構樹起源在台灣。因爲太平洋構樹嘸沒雄雌異株，無法自然產出種子，需由人類以其根部進行無性生殖來傳播，蓋咾可排除脫是由動物傳播个可能。太平洋構樹个樹皮是南島民族重要个資源，在祭典丄會使用樹皮布。因爲太平洋構樹搭南島民族間个緊密關係，應是隨著南島民族遷徙而傳播。昰個共生關係間接證實爻出臺灣假說。

巽他大陸起源說

由史蒂芬·歐本海默提出。巽他大陸起源說認爲嚜，冰河期个東南亞由於海平面比乃歇低，爪哇島、蘇門答臘島搭馬來半島連在一淘，形成巽他大陸，爲亞洲个延伸。但在間冰期，海平面上升，淹没脫昰爿區域。昰爿區域个居民被迫離開，形成南島語族。

中國沿海起源說

福建發掘个曇石山遺址，漳州東山大帽山遺址，寧德霞浦縣黄瓜山贝丘遗址，泉州晉江庵山沙丘遗址，福州平潭壳丘头遗址，據考證全跟南島語族起源有淵源。在福建出土石锛、石戈以及石叉等物品，在波利尼西亞仍常見。福建个幾大遺址裏向出土个石器、陶制品等文物制作个方法、生産工藝、母語語系等考證：南太平洋、印度洋个南島語族衆多島國居民个祖先，源於中國東南沿海。

中國醫藥大學講座教授葛應欽，利用演化基因學改進方法及技術，分析在馬祖亮島出土个亮島人遺骸，重建遺傳系譜，認爲早期南島民族約8000年前起源於福建沿海地區，反對臺灣或東南亞島嶼是早期南島民族發源地个說法，但佢弗以文化爲據及其無法證明亮島人有後代咾啥，令此講法至今尚未得到國際丄个普遍認可。

參見

• 南島語系