卢泰愚

卢泰愚（朝鲜语：노태우／盧泰愚 Roh Tae-woo，1932年12月4号－2021年10月26号），20世纪后半段东亚有名个政治人物。

1930年代，伊在拉朝鲜半岛南面大邱附近一个农民家庭出生，后势来，伊自称自家祖先是从西面个胶东半岛去朝鲜半岛个，也就是讲，伊个祖宗侪是山东人。

在拉小辰光，卢泰愚想当医生，弗过1950年韩国战争爆发之后，伊就参加军队，参加过韩国战争同后势来个越南战争。从此就在拉韩国军队当中一路升迁。

1980年，卢泰愚接替全斗焕，成为韩国个国军保安司令。在拉全斗焕执政个辰光，伊先后担任政务第二部长，后势来又成为专门为1988年奥运会新设个第一任体育部部长，内务部部长等职务。此外，伊还担任过1986年亚洲运动会组织委员长（1984年－1986年），1988年奥运会组织委员长（1983年－1986年）。

全斗焕执政挨末阶段，卢泰愚畀指定成全斗焕个接班人。之后，在拉六月民主运动当中，卢泰愚发表有名个六二九宣言，宣布修改韩国个宪法，恢复总统直选。1987年12月，卢泰愚在拉大选中击败金泳三、金大中搭金钟泌，当选韩国第十三任总统。