周庄镇（昆山）
（从周庄转戳到箇里）
周庄是隶属于江苏省昆山市搭仔上海交界处个一座典型个江南水乡小镇，目前已经成为著名个风景旅游区。
周庄大致有搭900年个历史，真正兴旺是由于明朝著名个富豪沈万三辣辣此地落户，沈万三由于富可敌国，只不过为了要犒劳朱元璋个军队，弄得“龙颜大怒”，拔发配充军到云南，葛佬名字竟然上了明史。
周庄辣1979年又因为画家陈逸飞辣辣此地住了几个号头，写生搜集了大量素材。陈逸飞后来旅居美国，画了交关手持乐器个人像作品，辣美国小有名气。伊拿周庄个中心双桥作为题材个作品《故乡的回忆》拔美国个“红色资本家”阿曼德·哈默以重金买下来，辣1984年访问中国个辰光作为礼物送给辣邓小平。双桥辣辣周庄中心一条分叉个河流叉口浪，成直角交叉，一座方形一座圆孔，赛过中国古代个钥匙，葛佬又叫做钥匙桥，由此周庄开始出名。
辣辣同济大学教授个帮助下头，周庄决定保护自家个古建筑，维护原有个水乡风貌，开辟成功旅游区，现在周庄所有个景点侪已经形成古镇旅游一票制，游客可以尽情欣赏沈万三个故居沈厅，由明朝开国元勋徐达个弟弟建造个，可以坐船直接入室个张厅等水乡建筑。上海市也辣此地附近个湖边浪兴建了“云海度假村”、“枫丹双桥度假村”、“申江大酒店”、“上海大观园”等休闲游乐场所。
周庄于2003年拔评为中国历史文化名镇。
文化
编辑| 中华人民共和国江苏省苏州市昆山市行政区划 | 
| ||||
| |||||
| 吴越江南名古镇列表 |
| ||||
| |||||