周瑞庭

周瑞庭（1869年—1949年），字名莹，高桥周家浜（乃朝上海市浦东新区高桥镇）人。伊从小屋里向就蛮穷个，11岁一家头去上海当木工。木工做唻好，故咾19岁个辰光当上木工档手，先后来勒杨斯盛、顾兰洲手底下头承包工程。1895年，伊来勒上海威海卫路（乃朝威海路）446号开设周瑞记营造厂。1907年，外白渡桥计划拿原先个木桥改造成钢结构桥，周瑞庭投标成功，来勒外国人面前拿老早木桥个木头桩子拔出来，打响名气，并先后承建礼查饭店、杨树浦发电厂一期工程、俄国公馆、扬子大楼、新闻报馆、敬业中学、浦东同乡会大厦、真如国际无线电台、乍浦路桥等上海老建筑。

除开营造业，周瑞庭来勒经营房地产搭其他行业上也是一把好手。伊独资创建个星昶地产公司拥有租界百亩地契。伊创办个福昌烟草公司，日产香烟1600箱，“九·一八”事变以后创立“九一八”牌香烟，香烟壳子正面个画像是张学良将军，提醒国民勿忘国耻，一致抗击日本侵略者。

周瑞庭发家以后，对地方公益事业也蛮有贡献个。1924年，周瑞庭出钞票疏浚界浜，花仔4個号头，疏浚16.7公里河道。1925年，伊出钞票拿镇上主要道路大同路从弹硌路改成宽8.33米个煤屑路。