哈同

哈同（Silas Aaron Hardoon，1851年6月—1931年6月19号），19世纪末、20世纪初上海一位犹太裔房地产大亨。

哈同

生平

1851年6月份，哈同出生勒奧斯曼帝國巴格达城一家贫穷个犹太人家庭里向，原名סאלח חרדון（Sileh Hardoon）。1856年，伊一家门搬到印度孟买，加入英国籍，来勒大卫·沙逊资助个慈善学堂里向读书。1872年，伊一家头到香港，第二年转到上海，来勒沙逊洋行做生活，做收租员搭仔守门人个生活。1886年，伊同一名中法混血，信佛教个罗迦陵结婚。箇後头，哈同个生活赛过是踏勒火箭丄，来勒房地产领域伊展现出经营天才，1887年做上海法租界公董局董事，1898年又改做上海公共租界工部局董事。1901年，哈同脱离沙逊洋行，独立创办哈同洋行，专营房地产。

哈同来勒开发经营"上海个第五大道"——南京路个辰光邪气成功，出资60万两白银用铁黎木铺设部分南京路，弗仅提高知名度，更让南京路丄个房子价钿涨唻莫牢牢。箇末哈同就成上海滩一大富人哉。

1904年，伊来勒静安寺路购地300亩，花仔70万两银元造上海最大个私人花园爱俪园（哈同花园），造个是典型个中国式园林。哈同夫妇热衷中国古典文化，还来勒园里向开办仓圣明智大学，侧重中国古代文字、古董搭仔典章制度。两家头还来勒杭州西湖个孤山平湖秋月附近用养子罗友良个名义买仔大片土地，1919年造仔园林建筑“罗苑”。1927年，国民革命军拿罗苑當第二十六军政治部留守处。1928年，国立艺术院成立，花仔1银元租赁罗苑当校址。乃朝是平湖秋月景点个一部分。

哈同夫妇呒没亲生囡，哈同领养仔11名外国孤儿，罗迦陵领养仔9名中国孤儿。1931年6月19号，哈同来勒爱俪园病故，留下来高达一亿七千二百万元或$150,000,000个巨额遗产，遗产税就高达1800万元。1941年，罗迦陵也走脱，必过因为夫妇二人留下来个遗嘱有弗小出入，引发哈同遗产案。1954年，中共政府征用爱俪园个地造仔中苏友好大厦（乃朝上海展览中心）。