土耳其

土耳其（土耳其闲话：Türkiye）来勒亚洲搭仔欧洲交界个场化，是一个由突厥文化统治者，通过同化当地土著搭希腊、亚美尼亚人之后构成个国家。

历史

土耳其自称来自中国历史高头个突厥部落，弗过根据现代DNA检测，土耳其人基本呒没突厥人血统。土耳其人是小亚细亚个入侵者，从1071年击败拜占庭帝国开始，逐渐拿小亚细亚突厥化。到13世纪，一个叫做奥斯曼个部落崛起，后头逐步兴盛，建立空前个帝国。

奥斯曼帝国

奥斯曼帝国个历史搭现在个土耳其有邪气大个关系。现在个土耳其人，基本就是迭个辰光发展开来个。奥斯曼帝国通过暴力手段，强迫境内个基督徒服从伊拉个统治。伊拉拉拢听话个阿尔巴尼亚人，潜隐默化让交关民族皈依回教。对拒绝皈依又反抗个希腊人、亚美尼亚人进行残酷镇压。

奥斯曼帝国切断西方搭东方个联系，直接造成文艺复兴搭大航海时代个来临。该帝国对西方个变化呒不啥兴趣，顶大个爱好就是征服欧洲，传播回教。从1453年灭亡拜占庭帝国开始，一直到1683年畀波兰国王来勒维也纳击败，奥斯曼帝国一脚来上进攻欧洲。顶大个辰光，奥斯曼帝国搭伊个附属国克里木汗国占据东欧大部分领土，对东欧造成严重破坏。

到18世纪，奥斯曼帝国国力越来越推板。苏丹畀大臣架空，成为摆设。国内反抗此起彼伏。到19世纪，东欧个民族终于来勒欧洲列强个帮助下一个一个独立。奥斯曼帝国恼羞成怒，来勒1914年开始对国内个亚美尼亚人进行大屠杀。迭个事件晓得个人弗是老多，弗过奥斯曼帝国个残酷阻止弗落伊拉军事高头个无能搭愚蠢。一战结束，奥斯曼帝国战败，畀列强瓜分。

凯末尔搭土耳其

凯末尔

来勒灭国个危机关头，凯末尔成为土耳其个民族英雄，伊击败希腊人，搭苏联媾和，又搞西化改革，终于让土耳其走上正常国家个发展道路哉。具体浪，伊强行让土耳其个老百姓使用新式个拉丁字母，强行让女人来勒公共场合弗著头巾面纱。又普及基础个教育制度，引进西方个制度。对外方面，主张中立，同时搭伊朗个巴列维王朝保持良好个关系，伊点侪让土耳其成功个实现现代化转型。第二趟世界大战辰光，土耳其宣布中立，之后加入北约，成为冷战当中对抗苏联集团个重要前沿。

政治

土耳其来勒法律层面高头是一个民主国家，自从1923年土耳其共和国建立开始，迭个国家就有邪气强烈个世俗主义传统。法律同时规定，土耳其政府个一个重要职责就是维护国家个统一搭稳定。土耳其总统是一个荣誉头衔（虽然2014年之后有所变化），任期5年。

实行三权分立个制度。政府个实际行政权力由土耳其总理搭著伊组建个内阁掌握。最高法院对一切法律具有最后个解释搭裁决权力。总理是通过国会提名选举产生个。所以，拥有最多席位个政党就好选择自家个领导人成为总理。现在掌控政权个是具有保守背景个正义搭发展党。

军事

土耳其现在有整个欧亚大陆前五个军事实力，搭中国、俄罗斯、印度、巴基斯坦、伊朗水平相当。土耳其还是北大西洋公约组织个成员国，并且拥有仅次于美国个顶庞大军队。2011年，土耳其个军队数量接近50万人。

相册

维基共享资源里向寻得着搭该篇文章搭界个多媒体资源：

土耳其

• 
  Ayasofya
• 
  Kocatepe Mosque
• 
  Etnografya Museum
• 
  Dolmabahce Palace
• 
  İzmir clock tower
• 
  Pamukkale
• 
  Eskişehir City
• 
  Antalya City
• 
  Alanya City
• 
  Sultan Ahmet Mosque
• 
  Diyarbakir City