复活节岛

复活节岛（拉帕努伊语：Rapa Nui, 西班牙语：Isla de Pascua）是智利所属个一只太平洋小岛，位于太平洋东南部，著名个“波利尼西亚大三角”个东南角就是伊。面积163.6平方公里，人口勒2012年个辰光是5761人，其中有60%是原住民拉帕努伊人，其他是带西班牙血统个智利人搭仔极少数南美洲原住民。勒1995年，联合国教科文组织拿复活节岛列为世界遗产。

历史

据估测，早勒公元300年至1200年之间个辰光，就有波利尼西亚人个祖先来到个只岛屿；弗过具体个辰光还呒没定论。对于箇些最早个岛民，伊拉顶可能个来源地是2600公里外个甘比尔群岛，以及3200公里之外个马克萨斯群岛。搭复活节岛个拉帕努伊语顶顶相似个语言就是甘比尔群岛个曼加瑞瓦语，两者相似度有80%。

勒浪公元18世纪前，复活节岛发展出仔一套自家个文明，当地人勒山高头岩石敲下来雕刻成巨人个形象，并拿箇些巨石像搬运去海岸旁边立出来。弗过待到1722年欧洲人第一记碰着迭个岛屿个辰光，当时个岛民已经侪讲弗清爽箇些巨石像是哪亨来个咧。迭趟刚刚好是1722年个复活节，荷兰人雅各布·罗格文拜访仔箇个岛，伊勒岛上住仔一个礼拜，并估计有岛民2000到3000人。

19世纪中叶，秘鲁个奴隶贩子劫掠仔复活节岛，将岛上一半个人口侪捉牢带出去做矿工。后来迫于舆论压力，箇些奴隶贩子再拿伊拉送回去岛上，弗过由于有人感染了天花等等疾病，回到岛浪向个人又将其他人感染，最终只有交关少个人活下来了。1888年9月，智利吞并仔复活节岛。

地理

复活节岛是一只火山岛，也是世界浪向顶顶偏僻个有人居住个场化之一。根据柯本气候分类法，伊个气候是热带雨林气候，但弗过刚刚好位于亚热带湿润气候个边界上。