夏完淳

夏完淳（1631年10月4号－1647年10月16号），乳名端哥，原名复，字存古，号小隐，又号灵首，南直隶松江府人，祖籍绍兴府。伊爸爸是迭个辰光松江有名个文人夏允彝，老师是松江才子陈子龙。小辰光，伊因为学习能力强出名，号称五岁就好写文章。弗过，后首来让伊闻名个，还是明末清初阶段，伊继承自家爸爸同老师个志向，年纪介小就坚持抗清个举动。1647年，抗清过程中，伊身份暴露，畀清帝国个爪牙抓到，杀脱。伊个墓地勒松江区小昆山镇荡湾村华夏公墓，葬叻伊爸爸墓旁边。