大柏树

大柏树，是上海市虹口区东北部到杨浦区西北部个一只地名，一般性指逸仙路、汶水东路、中山北一路、曲阳路、邯郸路五条马路交汇个五岔路口一带。

雍正2年（1724年），大柏树地区划进宝山。直到20世纪初，大柏树附近还是农田。1928年后，当地随江湾镇一道进入上海特别市，逐渐发展。1937年抗战爆发，箇面变成上海城北个军事要地。淞沪会战结束后，日军起碉堡，以1932年死拉江湾镇个大日本帝國第9师团联队长林大八个名字命名，叫箇個地方大八辻（“大八路口”个意思）。因为箇只辻字是和制汉字，所以当地中国居民叫伊大八寺或者大八字。

抗战胜利后，上海市政府认定“大八寺”是敌性地名，曾下令改叫“逸仙路”，呒没成功。1984年，上海市政府拿当地划进虹口区、杨浦区，第二年虹口区部分搞了只大八寺街道办事处。箇個辰光，弗少人反映大八寺是日本占领军留下来个名字，故咾勒拉1988年，大八寺街道改名成运光新村街道。1989年3月20号，上海市人民政府发布通知（沪府办［1989］45号），叫大家拿所有同大八寺相关个地名、店名、站牌名侪按照上海闲话谐音改成“大柏树”。

1993年，运光新村街道合併进曲阳路街道。

外部资料

• 上海市人民政府办公厅关于本市第九批道路、居民地命名、更名问题的通知（摘编）档案，存勒互联网档案馆当中。（2019年4月20号）
• 虹口区志·曲阳路街道档案，存勒互联网档案馆当中。（2016年3月26号）