弗朗茨·约瑟夫一世

弗朗茨·約瑟夫一世（德文：Franz Josef I，1830年8月18号－1916年11月21号），是出身奥地利哈布斯堡家族个王室成员，1848年接替精神有毛病个小叔担当奥地利帝国皇帝，之后执行传统主义策略，依靠老将拉德斯基弹压意大利搭奥地利、匈牙利个民族主义暴乱。1854年搭茜茜公主结婚（弗过更多是弗朗茨单方面欢喜茜茜）。1860年代，帝国面临著交关挑战并厾脱立在意大利搭德意志联邦个主导权。1866年普奥战争失败之后，弗朗茨对匈牙利人妥协，担奥地利帝国该组成奥匈帝国只二元体系。19世纪后半段，奥地利维持和平，维也纳成为犹太人聚居搭自由主义个城市，发展出著海会个文化艺术音乐咾排物事。弗过1900年代之后，奥匈帝国搭东方个俄罗斯帝国关系紧张并望德意志帝国靠拢。1914年，弗朗茨个法定继承人，侄子费迪南大公夫妇立在波黑首府萨拉热窝畀人刺杀，后首来奥匈帝国对塞尔维亚王国宣战，成为爻一战导火索。1916年一战进行当中，弗朗茨皇帝病死，享年86岁。伊个侄子卡尔一世继位，两年后哈布斯堡个帝国也在风雨飘摇当中完结。