昌邑路站

昌邑路站勒垃上海浦东新区洋泾街道民生路浦东大道路口正下头，为上海轨道交通14号线搭18号线个地下岛式车站。两条线路勒垃站台中部进行节点换乘。

途经浦东大道个上海轨道交通14号线有7.8公里路程同浦东大道地道工程重合，本站等6個勒垃浦东大道浪个14号线车站同浦东大道地道工程进行同步施工；而18号线越江段又同江浦路隧道叠加，勒垃本站形成从上到下有江浦路隧道、浦东大道地道、地铁站厅、14号线站台、18号线站台拢总六层个结构。

本站勒垃2021年12月30号开通，正好是14号线同18号线一期北段个开通日脚。本站是上海地铁继西藏南路站同东方体育中心站第三個开通就是换乘站个车站。

工程影响

车站东北面个浦东大道1585弄凌一小区居民反映，地铁建设过程当中，小区里向个房子搭地面侪有幅度弗小个沉降，造成房屋裂开、管道塞咾等影响。地铁方面表示会得按照房屋结构检测结果对居民进行相应个经济补偿。