爱新觉罗·溥仪(满文转写:Pu I,1906年2月7号-1967年10月17号 )乳名午格,字曜之,号浩然,洋名亨利(Henry)。伊是清帝国最后一个皇帝,也是满洲国唯一个执政个皇帝。

晚年溥仪

出生搭登基 编辑

1906年,溥仪在拉北京后海落北个醇王府(乃朝西城区后海北沿44号)出生。光绪三十四年(1908年)冬,光绪帝身体出仔情况。11月13号,只有两岁个溥仪畀拉抱到仔北京皇城里向,慈禧太后命令养伊养在拉宫里。11月14号,光绪帝在拉中南海瀛台驾崩,溥仪登基;其父光绪皇帝个阿弟载沣担任摄政王,控制实际个朝政;光绪帝个皇后隆裕成为仔皇太后,负责培养溥仪。但不过因为从小离开亲娘,溥仪身边侪是太监,心态受着仔影响,总体上向性格比较怪僻。

两趟退位 编辑

 
12岁辰光个溥仪

宣统三年(1911年),长江中游个武昌发生起义;之后,清帝国各行省侪各自宣布独立,溥仪拉爷载沣控制弗来局面,搭隆裕皇太后讨论仔之后,只好让之前畀伊拉赶来跑个袁世凯重新出山。但个能一来,反倒加快清帝国崩解。袁世凯后手来先让摄政王落台,再逼溥仪退位;1912年2月,隆裕皇太后同意仔以后,用溥仪名义下退位诏书,清帝国完结。

之后,根据袁世凯搭清朝皇室个协定,溥仪继续在拉北京紫禁城生活,弗过只好在拉三大殿背后个区域搭颐和园活动。迭段辰光里向,溥仪慢慢能长大,并借助军阀张勋相帮,在拉1917年宣布复辟。弗过,弗多几日,便受迫重新退位。

庄士敦个影响 编辑

在拉迭个一段辰光里,溥仪开始接受起来交关教育;但因为伊是畀废脱个皇帝,个咾教育形式相对老早个祖先,也比较多样。伊14岁之前教育还比较传统,早上学习满文、汉文、诗词,下半日还要学习天文、地理、历史。伊个老师当中,影响比较大个是遗老陈宝琛,后手来又聘请苏格兰人庄士敦教伊洋文同西洋知识。1920年代初,溥仪已经是年轻人,隆裕皇太后迭个辰光也老早故脱。伊通过庄士敦了解着交关西方动向以及西方历史上向个君主故事,开始有更大兴趣自家完成复辟。

离开紫禁城搭寓居天津 编辑

1924年10月23号,冯玉祥、胡景翼搭孙岳发动甲子兵变,推翻北洋当局个大总统曹锟。11月5号,冯玉祥命令手下鹿锺麟,配合国民党名流李石曾等“摄行大总统黄郛命令”,带《修正清室优待条件》开入紫禁城,命令溥仪签署声明,“取消帝号并离开紫禁皇城”,并吓溥仪讲,倘使拒绝,就用火炮射击紫禁城。溥仪无办法,只好答应。第二日,伊搬到阿爸个醇亲王府居住,并受着监视。1925年2月24号,在拉郑孝胥陈宝琛搭日本人协助之下,溥仪装扮成商人,经东交民巷日本大使馆,跑到使馆前方个火车站,乘车逃到天津个日租界,先后在拉日租界内个张园静园定居。

虽然畀赶出紫禁城让溥仪邪气殟塞,但到天津洋场,住在拉洋房当中,还是让伊获得更多个自由,好经常着西装、戴太阳眼镜,跑到天津个繁荣商业区去白相咾看西洋镜。后来溥仪自家也回忆,迭个阶段是伊人生当中顶开心个一段辰光。弗过,开心日脚并弗妨碍溥仪继续谋划自家个复辟。在拉天津,因为庄士敦已经老早转去哉,伊就搭郑孝胥逐渐走进,并且认为郑孝胥谈话个内容,启发性更加强。之后,河北发生孙殿英挖掘清东陵个事体,溥仪受着蛮大个刺激,更加坚定复辟个想法。

在拉满洲国个升起搭落幕 编辑

 
满洲国时代个溥仪

缘起 编辑

1931年9月18号,满洲事变发生,以熙洽为首个前清帝国贵族搭日本人建议,望好迎接溥仪到满洲、建立君主制国家。关东军也认为,溥仪是适合个人选。之后,特务土肥圆贤二频繁在拉溥仪身边活动,再加上仔郑孝胥个引导,让溥仪同意“背对中国人民,踏入到阴冷个白河”。

上台 编辑

1931年11月8号,土肥原贤二命令日本特务、瘪三,炮制“天津事件”,让溥仪趁机离开天津,转道旅顺,跑到日本控制区里向。1932年2月16号,关东军司令官本庄繁主持会议,决定让溥仪成为满洲国执政,并让板垣征四郎担任满洲国个军政部最高顾问。18号,发布《满洲国独立宣言》,23号,板垣在拉抚顺搭溥仪碰头,告诉伊拣定伊出任“满洲国执政”。溥仪一听弗是直接当皇帝,有一眼弗开心,但还是“摒牢仔”接受落来哉。

1932年3月1号,满洲国宣告成立。3月9号,溥仪在拉长春市吉长道尹公署道台衙门大堂举行就职典礼仪式,就任满洲国执政。

称帝 编辑

1934年3月1号,溥仪正式登基成为皇帝,年号康德,个咾又畀称为康德皇帝。日本天皇对伊表示恭喜;为表祝贺,特别赠送一辆凯迪拉克豪华都铎8C型轿车(Cadillac Deluxe Tudor Limousine 8C)畀伊。车首前方、车体后方搭车轮当中侪镶仔满洲国国徽在许。

统治 编辑

尽管名义上当上皇帝,但迭个皇位更多是虚君政治个花头,同溥仪设想当中通过满洲国来恢复清帝国个思路大推大扳。自从伊个老师——满洲国第一任总理郑孝胥搭日本人闹翻脱、强制下台之后,溥仪就晓得自家是弗可能在拉满洲国实现想法个。弗过,日本人替伊修造蛮大个皇宫,又在拉生活、虚荣上尽可能满足伊个胃口;溥仪在拉当康德皇帝个十几年当中,也弗用亲自过问因为第二趟世界大战而复杂个局面,实际上是蛮适意个。

落幕 编辑

1945年,日本在拉太平洋战争当中大败。溥仪一轧苗头弗对,外加因为自家人身自由受着仔日本人限制,无法应对;只有等到8月初苏联人大规模侵入满洲国个辰光,伊再领仔一帮宫内个人员,慢慢能转移在拉吉林东面去,想从此地趁飞机到日本。在拉此地,溥仪宣布退位,结束伊皇帝个身份。

战俘生活 编辑

在拉苏联 编辑

1945年8月20号,溥仪畀苏联士兵扣留在拉通辽市。之后,畀苏联空军运送到赤塔一号军用机场,囚禁在拉莫洛可夫卡30号特别牢监。11月初。畀转移到伯力45号特别牢监。受优厚待遇,弗需要参加劳动,更无啥改造。迭个阶段,溥仪身边还是有交关老早个随从。伊搭苏联人关系蛮好,多趟申请加入苏联国籍,但弗曾得着允许歇。远东国际法庭审判日本战犯个辰光,溥仪也作为证人出庭。伊拿自家同日本个合作侪推卸畀日本,号称自家是傀儡,是畀日本人胁迫当皇帝个。迭种讲法,后手来也体现在拉伊个自传当中。

抚顺战俘生活 编辑

1950年8月1号,溥仪搭满洲国其余263名战犯在拉绥芬河由苏联移交给中华人民共和国,之后,畀送往抚顺战犯管理所接受为期10年个劳动改造搭思想教育。溥仪的囚犯编号是981,迭个阶段,伊心里慌张来要死,常怕自家畀清算,个咾表现来邪气主动、接受改造个态度。因为认错态度诚恳咾,在拉1959年便放出来哉。

晚年搭亡故 编辑

好公民溥仪 编辑

铁窗泪结束脱么,溥仪得着仔上层个重点关照,安排伊转去北京,并且当成功“模仿公民”来宣传。迭只阶段,还安排伊讨仔新个老婆,经常参加参加文化活动,外加根据上头个要求,为迭排新时代个活动、自家个新身份表达感激个情绪。也是迭段辰光里,溥仪也写成功自传,当中充满自家前半生哪能荒唐,后半身哪能觉悟个段落。但不过,伊也无几许后半身个福气好享哉——1967年,溥仪患仔肾癌,死在拉北京。

陵墓三迁 编辑

搭清朝之前个皇帝两样,作为一个新公民个溥仪,自然是弗好有得自家个陵墓个。伊先畀火化,烧成功灰。之后,伊个骨灰畀摆在拉八宝山人民公墓,1980年迁到仔八宝山革命公墓。1995年,畀移动到北京市西南120公里个河北省易县华龙皇家陵园,此地也正好在拉清西陵近边。