熊島

熊島（Bjørnøya）是挪威勒北冰洋裏向個一隻島，勒巴倫支海西面，北角搭斯瓦爾巴群島航線個中途，面積178平方公里，嘸不常駐人口。

維京人作興勒公元10世紀之前就到過該隻島，但必過朆留下來任何確定個記錄。1596年，荷蘭探險家威廉·巴倫支到仔該隻島，因為勒島浪看見一隻北極熊，所以拿該隻島叫熊島。熊島其實弗是北極熊個聚居地，除脫少量北極狐之外也嘸不其他種類個動物。島浪植被以苔藓搭地衣為主。

20世紀初，俄國搭德國為仔爭巴倫支海個控制權，對熊島儕有佔領個意思。直到1920年熊島根據斯瓦爾巴條約劃畀挪威過後，雙方還勒熊島做過點像煤礦開發之類個商業工作。第二次世界大戰辰光，德國勒島浪設置過小型軍事基地，但必過勒巴倫支海海戰當中朆派上用場。1944年，蘇聯威脅要搶脫該隻島，但必過朆實施。目前熊島只有一個挪威個水文站搭一個廣播電台中繼站。