穀神星

穀神星（符号：, 英語、拉丁語：Ceres），正式名字是第1號小行星穀神星（1 Ceres），是勒太陽系裏向曉得個頂大個小行星，還是唯一勒垃主帶個一隻矮行星。俚勒1801年1月1號畀意大利天文學家朱塞普·皮亞齊發現，有半世紀長個辰光畀叫成功第8隻行星。俚個名字來源是刻瑞斯，是管植物生長、收穫搭慈愛個羅馬神。

穀神星直徑查弗多950公里（590英里），是小行星帶裏向曉得個頂大、頂重個天體，質量佔小行星帶總質量個三分之一（32%）。最近個觀測顯示俚外表像隻球，搭其他小點外加重力低點形狀弗規則個小行星弗一樣。穀神星個表面可能是各種水冰搭水合礦物（譬方碳酸鹽岩搭黏土等）個混合物。穀神星也出現仔分化，有岩石化個核心搭以冰為主的地幔，表面作興有勒液態水海洋下頭形成個海灣。

從地球看穀神星，俚個視星等勒6.7到9.3當中變化，該個亮度忒暗哉，直接用眼睛看弗見。勒2007年9月27號，NASA發射仔黎明號太空船去探測竈神星（2011年7月抵達）搭穀神星（2015年3月抵達）。