翳
越王翳（？─前375年）又称越王不光、越王授，是战国个辰光越国个君主，朱勾死脱以后，太子翳即位为君主，前410年到前375年在位36年。俚在位期间，越国依然称霸中原；晚年内外局势恶化，霸业逐步衰败，只好返回江南。俚畀杀脱以后，越国陷入之内乱外患个动荡时期。
生平
编辑王翳七年(前404年)，越王翳凭借强大个军事实力，趁齐国执政者田和个地位还弗穏固个辰光，发兵讨伐齐国。搿许辰光，缯国（今朝山东枣庄）倚仗齐国个势力，轻视越国。越王翳听之过后大怒，下令讨伐缯国，一战拿俚攻灭。
王翳二十年(前391年)，齐国田和拿齐康公迁到海岛浪，夺取整个齐国。越王翳发兵进逼齐国边境，齐国大将向田和请求反攻越军。田和经过考虑之后回答：“先君有遗令曰：无攻越！越，猛虎也！”弗敢搭越国正面交战。王翳廿五年(前386年)，周安王正式承认田氏齐国为诸侯，田齐虎视越都琅琊（今朝连云港）。越国面对齐、楚日益强盛，勒中原难以维持霸权；而吴国旧贵族侪想要复仇，板调加强防备。琅琊远离江南，军队搭物资运输侪交关困难。权衡再三，勒王翳三十三年(前378年)迁都吴（今朝苏州），加强对吴越地区个控制。同时，北方个越人开始大批返回江南，有种开始迁居到岭南。但不过，越国呣没放弃琅琊，还是拿俚作为北方都城。
王翳三十六年(前375年)，越王翳个兄弟豫，为之继承王位，连续谋害三个王子。过后，豫又挑唆越王，企图除掉太子诸咎，畀越王拒絶。七月，诸咎担心自家个处境，索性带领军队拿豫赶走，又包围王宫，发动宫廷政变。越王翳畀诸咎杀脱。十月，越国人杀脱太子诸咎，越国开始内乱。勒吴地个越国人拥立诸咎个倪子错枝做越王。第二年，越国卿大夫寺区平定内乱，拥立无余之做之越王。
近年来出土个越王青铜剑当中，又以越王翳在位期间所制作个数量最多。