莫雷斯内特
莫雷斯内特（Moresnet），全称中立莫雷斯内特（德語：Neutral-Moresnet；法语：Moresnet neutre；荷兰语：Neutraal Moresnet；世界语：Neŭtrala Moresnet），是拉1816年到1919年独立存在个一隻欧洲共管领土，面积只有约莫3.5平方公里。莫里斯内特个独立是因为两个大个邻国在拉渠个归属问题上弗能取得一致意见，因此决定让渠成为中立个领土，平等共享控制权。莫雷斯内特来勒亚琛西南约莫7公里个地方，来勒德国、比利时、荷兰三国边界交点丄个法尔斯山正南面。
历史
编辑
1815年维也纳会议个辰光，为咾适应列强之间个新个政治平衡，欧洲国家间个版图重新划定仔交关，箇當中包括新成立个荷兰联合王国同普鲁士之间个边界。两国对莫雷斯内特地区个归属产生争议，因为莫雷斯内特村到新莫雷斯内特地区當中是锌矿。1816年，双方妥协：莫雷斯内特村划畀荷兰，新莫雷斯内特划畀普鲁士，矿区搭仔周围个凯尔米斯村变成功中立领土，双方共管。
新领地大样模子是隻三角形，底边是从亚琛到列日个公路。矿区就来勒路北面。三角形个另外两条边向北延伸，来勒法尔斯山交汇。1830年，比利时从荷兰独立，莫雷斯内特周围荷兰个领地也转交畀比利时，比利时也参与管理莫雷斯内特。一开始，莫雷斯内特由比普两国个王室委员管辖，後些来莫雷斯内特有仔更大程度个自治，由一位市长搭仔一隻10人个委员会管理，市长由两委员指派。
莫雷斯内特人主要是做锌矿工人过日脚，吸引仔一些邻国个人，形成“中立”个人口结构。莫雷斯内特低税、进口免关税，过境成本低咾啥个优势也吸引些人来。弗少政府服务，比方讲邮政，就是由比利时搭仔普鲁士共同分担个，本地个“中立”人口甚至可以选择服何一隻国家个兵役，依意愿选择何一隻法院管理。
1885年，矿产资源枯竭，莫雷斯内特啊会得继续独立存在下去是大家心里向困惑个地方。关于哪能拿莫雷斯内特变成功一隻更独立个国家，人提出仔一些意见，比方讲造座赌场、造座邮局，发行自家个邮票。顶有创意个提议来自威廉·莫利（Wilhelm Molly）博士，伊建议拿莫雷斯内特造成世界丄第一隻世界语国家，国名就叫“Amikejo”(“友谊之地”)，提出一支同名个世界语进行曲作为国歌。
必过比利时搭仔普鲁士两国从来呒没放弃过对箇块土地个领土要求。1900年，普鲁士开始采取强硬立场，破坏原先个管理手段。1915年，第一次世界大战个辰光，德国吞并莫雷斯内特。战後个凡尔赛条约就规定莫雷斯内特划畀比利时。第二次世界大战个辰光，德国再吞并箇块地方，1944年再回归比利时。乃朝，箇块地区受比利时德语市镇凯尔米斯个管理。
