裕丰纱厂旧址

裕丰纱厂旧址是中华人民共和国上海市杨浦区个一组历史建筑，来勒杨树浦路2866号，西面是杨树浦发电厂，南面是黄浦江，东面是定海路桥，帮复兴岛隔开条运河。裕丰纱厂旧址是上海市留存顶完整、规模顶大个锯齿形厂房建筑群。自从20世纪造好以来，箇只房子一直是棉纺厂个厂区，一脚用到2007年国棉十七厂停产。2009年以后，厂房畀改造成上海国际时尚中心，成为购物街区帮时尚园区。

裕丰纺织株式会社旧址
俯瞰裕丰纱厂旧址
上海市文物保护单位
坐标	31°16′16″N 121°33′28″E
分类	近现代重要史迹及代表性建筑
时代	1922年—1935年
编号	8-53
登录	2014年4月4日

历史

1914年，日本个东洋纺织株式会社决定来勒上海造工厂，由平野勇造设计，1921年开始施工。1922年，厂长办公楼帮第一工场落成，有纱锭24000枚；1924年，第二工场落成；1930年，第三工场落成；1932年，第四工场落成；1935年，第五工场、第六工场落成。1935年6月份，工厂独立成裕丰纺织株式会社（日文：裕豊紡績株式会社），通称裕丰纱厂，占地面积约12万平方米，建筑面积约14.8万平方米，有纱锭191400枚、线锭49648枚、织机2996台。1942年，裕丰纱厂从东洋纺织株式会社接受35105枚毛纺锭，兼做毛纺业务。1943年，裕丰纱厂拿厂里向个部分机器拆成废铁，捐畀日军。1944年10月份到1945年7月份，盟军空袭裕丰纱厂三趟，趟趟侪组织修复，重新投入生产。

日本投降后，裕丰纱厂作为敌产畀国民政府经济部接收。裕丰纱厂逐步恢复生产，有纱锭117860枚、线锭24432枚、织机2822台。1945年12月4号，中国纺织建设公司成立，裕丰纱厂来勒第二年1月份划到箇家公司下头经营。1946年3月份，裕丰纱厂改名中国纺织建设公司上海第十七棉纺织厂，简称上棉十七厂。1949年5月27号，上海解放；两天以后，上海市军管会轻工业处接管中国纺织建设公司，工厂改名叫国营上海第十七棉纺织厂，简称国棉十七厂。箇辰光，工厂有纱锭97000多枚、线锭20000多枚、织机2700台、职工5500名。

1951年开始，国棉十七厂个毛纺设备畀清河制呢厂、上海第二毛纺厂、上海第三毛纺厂接收。朝鲜战争爆发，国棉十七厂向中国人民志愿军捐仔32.5万人民币，是伊个辰光捐款顶多个上海国有企业。1953年，国棉十七厂接收国棉二十七厂个纱锭，进一步扩大生产规模。1960年，国棉十七厂有纱锭140676枚、线锭20752枚、织机2784台、职工7805名。

“文化大革命”个辰光，国棉十七厂是中共中央副主席王洪文个发迹地，也是上海工人造反派个发源地。王洪文升任中共中央副主席以后，伊来勒国棉十七厂个办公室完全保留原貌，就连办公桌玻璃板下头压勒个选民证也没动过。1970年代初期，国棉十七厂帮王洪文个办公室成为“革命的圣地”，工人造反派就来勒箇埭参观，接受“革命历史教育”。

改革开放以后，国棉十七厂个职工数量上万唻。为咾顺应“退二进三”个口号，国棉十七厂个母公司上海纺织集团开始大规模调整搭仔战略转型，减员、压锭。1999年9月份，工厂厂房作为“裕丰纱厂”成为第三批上海市优秀历史建筑。2007年3月份，国棉十七厂停产，厂内设备搬去江苏大丰市，成为上海纺织（集团）大丰纺织有限公司个组建基础。

为咾顺应上海市发展“时尚之都”个目标，上海纺织集团决定拿工厂旧址改造成一只好跟国际时尚业界互动对接个地标搭仔营运承载基地。2009年，上海国际时尚中心——国棉十七厂改造项目正式立项，由夏邦杰建筑设计咨询（上海）有限公司负责规划设计。2010年5月份，上海国际时尚中心一期项目完工，对外开放。2011年6月份，上海国际时尚中心二期项目完工。2012年3月份，上海国际时尚中心一、二期整体开放。2014年4月4号，工厂厂房作为“裕丰纺织株式会社旧址”，成为第八批上海市文物保护单位。2024年10月22日，工厂厂房作为上海第十七棉纺织总厂 ，成为第六批国家工业遗产。

现况

现在个上海国际时尚中心是只购物街区搭仔时尚园区，是东方国际集团个，国家4A级旅游景区。上海国际时尚中心建筑面积约14.3万平方米，占地面积约12.08万平方米。园区里向好分成时尚会所、多功能秀场、时尚精品仓、娱乐餐饮区、创意办公区、设计师工作站六只板块。当中，多功能秀场板块号称是中国乃至亚洲设施顶完备、配套顶齐全个专业秀场。

建筑

来勒南区个4号楼建筑

裕丰纱厂旧址畀杨树浦路分成南、北两只部分：南区个建筑有1号楼（厂长办公楼）、3号楼（第一工场）、5号楼（第二工场）、6号楼（第三工场）、4号楼（第四工场）咾啥个；北区个建筑有7号楼咾啥个。

南区个厂长办公楼帮四个厂房是1922年到1934年造个，采用锯齿形屋顶。箇些房子里向，除开顶早造好个1号楼帮3号楼用个是砖木结构，挺下来三栋厂房用个侪是钢柱钢架。南区个厂房高大通透，墙顶是联排大型气窗，帮厂房锯齿形个屋顶相搭，满足工厂车间个采光、通风、散热需求。

北区个厂房7号楼是1935年造个，是两层楼个封闭式厂房。7号楼底部个纺纱间用个是钢筋混凝土框架结构，顶部个织布间用个是钢柱钢桁架结构。车间里向个管道侪囥勒天花板里向搭地底下头。屋顶个结构比较特殊：屋面铺钢筋混凝土预制板，高头开个是多只采光个小天窗，天窗有磨砂玻璃。7号楼车间个采光、通风、温度、湿度侪是人工控制个，是全中国第一只采用空气调节系统个二层楼厂房。