费米子

费米子（Fermion）指量子力学里向遵守费米-狄拉克统计个粒子。

量子力学拿粒子分成功费米子搭玻色子（Boson）两类，后者遵守玻色-爱因斯坦统计。

基本费米子

标准模型确认两类基本费米子：夸克搭轻子。而箇两类基本费米子，又分成功廿四種味道（flavour）：

• 十二種夸克：上夸克 （u）、下夸克 （d）、奇夸克 （s）、粲夸克 （c）、底夸克 （b）、顶夸克 （t），搭著渠拉对应个六種反粒子；
• 十二種轻子：电子（e^-）、μ子 （μ^-）、τ子 （τ^-）、电中微子（ν_e）、μ中微子（ν_μ）、τ中微子（ν_τ），搭著渠拉对应个六種反粒子。

理论上，费米子有得三種：带质量个狄拉克费米子、勿带质量个伐依尔费米子、粒子搭反粒子一样个马约拉纳费米子。除脱中微子，标准模型里个费米子侪是狄拉克费米子。

复合费米子

复合粒子根据组成成分确定是玻色子还是费米子。奇数数量个费米子好组成一隻费米子，渠拉自旋为半整数。譬方，

• 像中子、质子眼强子，侪是三隻夸克（三隻费米子）组成个费米子。
• 氦-3（³He）原子有得两隻质子、一隻中子、两隻电子（五隻费米子），个咾是费米子。
• 氦-4（⁴He）原子有得两隻质子、两隻中子、两隻电子（六隻费米子），个咾是玻色子。