陈从周（1918年11月27号－2000年3月15号），原名郁文，字从周，以字行，晚年号梓翁。原籍浙江绍兴，在拉杭州出生，是20世纪江南地区顶有名个古建筑搭仔古园林专家，对吴越地区个园林建筑修复有邪气大个贡献。20世纪阿末20年，伊主持修复仔交关建筑，包括南京瞻园、宁波天一阁、上海城隍庙、如皋水绘园咾啥。伊也是有名个园林搭仔建筑作家，出版歇个自家作品包括《苏州园林》、《扬州园林》、《园林谈丛》、《说园》、《绍兴石桥》、《春苔集》、《书带集》、《帘青集》、《山湖处处》、《梓室余墨》咾啥。个当中，《说园》五篇为顶重要个作品。
