高境镇

高境镇是上海市宝山区下头个一座镇，勒拉宝山区东南角，跟伊贴壁个是杨浦区五角场街道、新江湾城街道、虹口区江湾镇街道、静安区临汾路街道，西面是宝山区庙行镇，北面是张庙街道、淞南镇。面积7.1平方公里。总人口136882人（2015年），当中常住户籍人口67080人（2015年）。

高境镇个名字是从元朝末年造个高境庙来个。伊本来是宝山县江湾乡个一部分，必过因为城市发展，江湾乡个主体变成市中心个虹口区哉。1994年，留拉宝山区个部分撤乡建镇，必过虹口区伊部分已经叫江湾镇哉（今朝个江湾镇街道），箇么拿北面个古道观“高境庙”（老早拆脱哉，原址勒拉上海交通大学附属中学校园里向）个名字命名，叫高境镇。