2003年上海地铁4号线董家渡段建设事故

2003年上海地铁4号线董家渡段建设事故发生勒2003年7月1号凌晨，来勒造上海轨道交通4号线浦东南路站（工程名，曩朝塘桥站）南浦大桥站区间隧道连接上、下行线个安全联络通道个辰光，因为操作失误导致水搭流沙涌进来，隧道坏脱、周边地区地面沉降，直接经济损失1.5亿元。

事故隧道

事故隧道是上海轨道交通4号线浦东南路站到南浦大桥站区间隧道，上行线长2001m，下行线长1987m，江中段440m。区间隧道顶最大埋深37.7m，箇只土层砂性重，容易液化。联络通道来勒上海顶活跃个承压水层，承压水最高水位是地面以下7.58米，最高水头21.7米。隧道中心线水平距离10.984m，隧道最大坡度3.2%，盾构从浦东向浦西推进，发生事故个隧道联络通道用个是冻结法，风井用个是逆作法，事故发生个辰光已经修好哉。

事故经过

2003年7月1号凌晨4店多，浦东南路站到南浦大桥站区间一条使用冻结法挖个上、下行隧道联络通道洇出来水，隧道里向个施工人员弗得弗紧急撤离，后些来交关流沙涌进隧道，内外压力失衡导致隧道部分坍脱，地面也随之出现漏斗型沉降。

7月1号上半天6点钟，中山南路847号个8层楼房裙房发生明显变形，墙面开裂，房屋开始笡过来；9点多发生二次突沉，部分坍脱；15点多，以风井为中心，地面沉陷加快，逐步形成沉陷漏斗。坍塌范围扩展到董家渡路、中山南路、外马路、防汛墙，因为报警及时，呒没人伤亡。

7月2号，董家渡外马路段长约30米个防汛墙因为地面沉降，来勒凌晨4:45分左右局部沉陷开裂，市指挥部立时三刻抢堆沙包来堵漏，阿末防汛墙来勒7月3号零点多坍塌。靠近事故现场个廿多层个临江花园大楼也出现沉降，最大累积沉降量达到15.6毫米。到2号夜里向10点钟，官兵来勒黄浦江边、防汛墙漏个地方搭起长160米长、2米多高个“U”字型围堤，基本控制险情；管片损坏程度进一步扩展，并有管片连接螺栓绷断个声音；音像市场笡得唻楼板也断脱哉；文庙泵站发生突沉；临江花苑大厦沉降速率加快，沉降量达12.2毫米，地下室出现裂缝。河床严重扰动、下沉、滑移，近30米防汛墙坍塌，近70米防汛墙结构严重破坏，黄浦江水冲向风井，从风井涌入地下隧道，加剧险情发展。

救援工作

7月1号凌晨，武警上海总队接到抢险通知，九支队300名官兵迅速赶到现场展开抢险救灾。

7月2号上半天9点钟，区间隧道浦西联络通道基本封堵完脱，基本解除因险情造成个对整只轨道交通4号线区间隧道个威胁；采取注浆压浆咾啥个技术手段，尽量减少地下流沙个涌动；开始拆脱沉降严重个中山南路847号。

7月2号凌晨，中共中央政治局委员、上海市委书记陈良宇来到中山南路轨道交通4号线事故现场，实地调查、详细询问房屋倒塌、防汛墙险情咾啥个事故情况，来勒现场指挥部召集有关部门领导专家分析事故原因，研究应急处理对策。

7月3号中午，开始加固路面地基，向临江花园大厦大楼个地底下头注浆。

7月3号下半天1：30分，武警围起来个防护堤冷陌生头坍塌，十数位参加抢险个武警战士畀冲到水里向。

7月4号，险情开始平稳，国家建设部部长汪光焘带领国务院专家组急赴上海，对4号线建设工地突发事故抢险工作进行指导。随同来上海个专家组成员有：建设部工程质量安全司副司长徐波，建设部总工程师金德钧，交通部总工程师曹佑安，中国建筑科研院地基专家、工程院院士黄熙龄，中国建筑科研院院长、地基专家、高工王铁宏，中国建筑科研院顾问、总工程师刘金砺，中国建筑科研院地基所所长、教授级高工滕延京，北京城建集团顾问、地铁专家、教授级高工贺长俊。

7月8号，上下行隧道封堵成功，近2公里长个黄浦江上下行越江隧道树起八堵水泥钢筋混凝土墙。

事故原因

2003年9月20号，上海市政府公布上海轨道交通4号线工程事故原因、性质、经济损失个最终调查结论，拿事故定性为“造成重大经济损失的工程责任事故”，有三只原因造成事故：

1. 施工方改变了开挖顺序，来勒挖隧道风井个竖井个辰光应该先挖旁通道，再挖竖井，结果顺序调过来哉，邪气容易坍塌。事故发生个辰光，一只小竖井已经挖好，另外一只也已开挖2米左右。施工单位呒没按规定程序调整施工方案，且调整后个施工方案存在欠缺。
2. 6月28号，施工用个冷却设备因断电出现故障，温度回升两度多个辰光，技术人员拿情况汇报畀中煤矿山工程有限公司上海分公司项目副经理李柱和，副经理要求继续施工，引发险情。
3. 6月30号夜里向，施工现场出现流沙，施工单位采取措施，用干冰紧急制冷。专家认为，现在来看箇只措施用场弗大，必过究竟是何里只层面个应急处置出仔问题还弗清爽。

按照官方说法，原因还包括总包单位现场管理失控，监理单位现场监理失职。

审判

三人因涉嫌重大事故责任罪畀逮捕，包括：

1. 北京中煤矿山工程有限公司上海分公司项目副经理李柱和
2. 上海隧道工程股份有限公司项目经理袁强华
3. 上海地铁咨询监理科技有限公司总监代表李关强

中煤上海分公司项目经理、地铁监理公司总监、隧道公司项目负责人畀取保候审。上海还对事故相关单位领导追究领导责任：

1. 上海隧道公司总经理、分管副总经理行政撤职
2. 上海地铁运营公司总经理行政记大过
3. 上海城建集团总经理行政记过。

2003年10月16号，中华人民共和国建设部公布《关于上海轨道交通4号线“7·1”重大工程事故的通报》，对部分单位进行资质降级。

后续影响

南浦大桥站站厅里向箇事故主题浮雕

• 上海轨道交通4号线弗得弗推迟到2007年全线开通。
• 上海市建设委员会从7月3号开始，来勒全市范围里向开展为期一只号头个建设工作质量安全检查，检查重点包括深积坑、模板支撑工程等，上海市建委要求对各类安全质量隐患必须限期整改，对严重安全质量问题必须严肃处理。
• 南浦大桥站站厅层个一只浮雕壁画主题就是箇桩事体。