誓反裂教
（从宗教改革转戳到箇里）
誓反裂教，也就是一般文人称呼个宗教改革(西文：Reforma protestante），是16世纪开始辰光立在中欧发生个一系列对天主教教会个动乱，反动事件。迭个事情个动机比较复杂，一般认为是君主为自家个利益，搭资产阶级之类一道，利用宗教名头对天主教代表个传统势力进行瓦解。因为新教徒一般侪反对罗马个权威，自家号称要自家解释圣经，所以，也好拿新教徒叫做抗罗宗。
影响
编辑誓反裂教搭个辰光哈布斯堡个势力崛起；法国西班牙立在亚平宁半岛个鏖战，以及地理大发现结合立在一道，构成文艺复兴之后欧洲国际政治搭社会文化变迁个三大话题（西班牙搭奥斯曼帝国个地中海战争也立在同期进行）。本身铁板一块个天主教，立在各地马丁路德，加尔文之流个煽动下，发现自家老早个策略弗适合新局面。个能，也有后势来反宗教改革个拉特兰会议出现以及耶稣会个建立。西北欧交关君主通过支持裂教，让自家脱离天主教影响，扩充自家国王个权威，个当中个代表就是英格兰国王亨利八世。裂教带来个战争搭政治牵扯成为之后一百年当中一个邪气重要个问题，也基本成为所有欧洲战争个借口搭由头（参见八十年战争）。迭个局面一直持续到1648年三十年战争完结之后，才让位把更加世俗，用君主专制做行为主导个路易十四法式专制潮流。